कर्तव्यात कसूर, अहवाल सादर – निलंबित पोलिस निरीक्षक शेळके यांच्या अडचणीत वाढ – पोलिस अधीक्षक रितु खोखर
धाराशिव दि.१४(अमजद सय्यद):कर्तव्यात कसूर, वरिष्ठाच्या आदेशाचे पालन न करणे, शिस्तीचे पालन न करणे व कर्तव्य न बजावणे, आरोपीला सहाय्य करण्याचा उद्देश असा ठपका धाराशिव ग्रामीण पोलिस ठाण्याचे निलंबित पोलिस निरीक्षक मारुती शेळके यांच्यावर ठेवला आहे. शेळके हे लाचलुचपत गुन्ह्यात आरोपी असुन ते निलंबित आहेत. येडशी येथील कालिका ढाबा येथे वेटर म्हणुन काम करणाऱ्या मुकुंद कसबे मृत्यु प्रकरणात आरोपीला त्यांनी मदत केल्याचा त्याच्यावर ठपका आहे, शेळके हे या गुन्ह्यात तपास अधिकारी होते.
पोलिस अधीक्षक रितु खोखर यांनी आपल्या अहवालात शेळके यांच्यावर अनेक मुद्यावर ठपका ठेवत तो अहवाल छत्रपती संभाजीनगर विभागाचे विशेष पोलिस महानिरीक्षक वीरेंद्र मिश्र यांच्याकडे पुढील कार्यवाहीसाठी पाठवला आहे. त्यावर चौकशी होऊन पुढील कारवाई केली जाणार असल्याचे खोखर यांनी सांगितले.
मुकुंद कसबे मृत्यु प्रकरणात 2 वेगवेगळ्या कहानी समोर आल्या असुन पहिल्यादा अकस्मात मृत्यू तर त्यानंतर 15 महिन्यांनी तो ‘अपघात’ असल्याचे नमुद करीत 2 वेगवेगळे गुन्हे शेळके यांनी नोंद केले होते. मात्र अखेर या मृत्युंच कोडं सुटले असुन हॉटेल मालक राहुल देशमुखे याला आनंदनगर पोलिसांनी 304 कलम अंतर्गत अटक केली.
देशमुखे याला कलम 304 ( मृत्यू मात्र ठरवून केलेला/हेतुपूर्वक खुन नव्हे ) 201 ( पुरावा नष्ट करणे ) या अंतर्गत गुन्हा नोंद करण्यात आला आहे. कसबे प्रकरणात देशमुखे तक्रारदार होता मात्र तोच आता आरोपी बनला आहे. या प्रकरणात पुरावे दडवून आरोपीला पाठीशी घातल्याची माहिती कळताच दैनिक समय सारथी वृत्तपत्राने पाठपुरावा केला होता, त्या पाठपुराव्यानंतर यातील ‘सत्य’ समोर आले आहे. पोलिस निरीक्षक शेळके व इतर काही जन यात रडारवर आहेत.
21 मार्च 2024 रोजी येडशी येथील हॉटेल कालिका ढाबा येथे वेटर मुकुंद माधव कसबे (रा मोहा, ता कळंब) हा काम करीत होता. काम करीत असताना ढाब्यासमोर सिमेंट काँक्रेटवर पडून कानातुन रक्त आल्याने त्यास रुग्णालयात ऍडमिट करण्यात आले व 23 मार्चला त्याचा उपचारा दरम्यान मृत्यु झाला अशी तक्रार राहुल बाळासाहेब देशमुखे यांनी दिली त्यावरून धाराशिव ग्रामीण पोलिस ठाण्यात आकस्मात मृत्यूची मयत क्रमांक 17/24 सीआरपीसी कलम 174 प्रमाणे नोंद घेण्यात आली. त्यावेळी कोणावरही संशय तक्रार नसल्याचा जबाब हॉटेल मालक राहुल देशमुख यांनी दिला.
देशमुखे यांना घटनेच्या तब्बल 1 वर्ष 3 महिन्यांनी साक्षात्कार झाला व त्यांनी धाराशिव ग्रामीण पोलिसात 2 जुन 2025 रोजी फिर्याद दिली की, मला आज रोजी ढोकी येथील धनराज किसन कांबळे यांचेकडुन माहिती झाले की, मुकुंद कसबे हा ढाब्यासमोरील उड्डाण पुलाजवळ लातुर ते बार्शी रोडवर गेला असताना बार्शीकडुन येणारे एका मोटर सायकलने त्यास जोराची धडक दिली त्यामुळे तो खाली पडला. त्यानंतर तो पडलेल्या ठिकाणाहुन उठून ढाब्याकडे चालत आला व काँक्रेटच्या कोब्यावर पडल्याने कानातून रक्त आले. त्यावेळी मला तो काँक्रेटवर पडल्याने रक्त येऊ लागले असे वाटल्याने मी व लक्ष्मण जाधव त्यास दवाखान्यात घेऊन गेलो व उपचारानंतर त्याचा मृत्यु झाला म्हणुन भादवी कलम 304 अ, 279 व मोटार वाहन नियम 187 प्रमाणे 2 जुन 2025 ला गुन्हा नोंद केला.
आत्महत्या प्रकरणात दाखल गुन्ह्यात एका आरोपीवर कारवाई न करण्यासाठी 1 लाख रुपये लाचेची मागणी करुन 95 हजार स्वीकारल्या प्रकरणी धाराशिव लाचलुचपत विभागाने पोलीस निरीक्षक मारुती शेळके व महिला अंमलदार मुक्ता लोखंडे यांना अटक केली आहे. शेळके लोखंडे या जोडीने एका सहकारी पोलिस महिलेकडुन लाच घेतली हे विशेष.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
