यात्रा मैदानाच्या प्रश्नावर महिलांचा एल्गार मुख्याधिकाऱ्यांच्या खुर्चीची ओटी भरून अनोखे आंदोलन

यात्रा मैदानाच्या प्रश्नावर महिलांचा एल्गार मुख्याधिकाऱ्यांच्या खुर्चीची ओटी भरून अनोखे आंदोलन

तुळजापूर लोकविचार

तुळजापूर येथील प्रलंबित यात्रा मैदानाच्या प्रश्नावर गुरुवारी महिलांनी नगरपरिषद प्रशासनाविरोधात आक्रमक भूमिका घेत नगरपरिषद कार्यालयासमोर ठिय्या आंदोलन केले. प्रशासनाकडून वारंवार आश्वासने मिळूनही कोणतीही ठोस कार्यवाही होत नसल्याचा आरोप करत आंदोलनकर्त्यांनी नगरपरिषदेच्या मुख्याधिकाऱ्यांच्या खुर्चीची प्रतीकात्मक ओटी भरून निषेध व्यक्त केला.

यात्रा मैदानासंदर्भात यापूर्वी अनेक वेळा निवेदने सादर करूनही प्रशासनाने कोणताही ठोस निर्णय घेतला नसल्याने महिलांमध्ये तीव्र नाराजी निर्माण झाली आहे. आंदोलनाच्या दिवशीही मुख्याधिकारी कार्यालयात अनुपस्थित असल्याने महिलांनी संताप व्यक्त करत त्यांच्या खुर्चीला साडी, चोळी आणि बांगड्या अर्पण करून अनोख्या पद्धतीने निषेध नोंदविला.

आंदोलनकर्त्यांनी प्रशासनाकडून स्पष्ट आणि लेखी आश्वासनाची मागणी केली होती. मात्र, नगरपरिषदेच्या वतीने देण्यात आलेल्या पत्रामध्ये कोणताही ठोस निर्णय अथवा समाधानकारक हमी नसल्याचे सांगत महिलांनी ते पत्र स्वीकारण्यास स्पष्ट नकार दिला.

यावेळी आंदोलनकर्त्यांनी प्रशासनाला अंतिम इशारा देत पुढील तीन दिवस आंदोलन स्थगित ठेवण्याचा निर्णय जाहीर केला. मात्र, या कालावधीत यात्रा मैदानाच्या प्रश्नावर समाधानकारक तोडगा न निघाल्यास सोमवारी पुन्हा अधिक तीव्र आंदोलन छेडण्यात येईल, असा इशाराही त्यांनी दिला.

तुळजापूरमधील यात्रा मैदानाचा प्रश्न दिवसेंदिवस अधिकच गंभीर होत असून या आंदोलनाला विविध सामाजिक संघटना तसेच राजकीय स्तरातूनही पाठिंबा मिळत आहे. त्यामुळे आता नगरपरिषद प्रशासन या प्रश्नावर कोणती भूमिका घेते आणि नागरिकांच्या मागण्यांवर काय निर्णय घेते, याकडे सर्वांचे लक्ष लागले आहे.

लोकविचार सत्य शोधून लिहिण्याची ताकद संपादक अमजद सय्यद 8390088786