“‘कधी आहे प्रवेश” जि.प. अध्यक्षा सौ.अर्चनाताई पाटील यांच्या व्हॉट्सअॅप कमेंटची जोरदार चर्चा, कैलास पाटील यांच्या पक्षप्रवेशाच्या चर्चांना पुन्हा उधाण
धाराशिव Lokvichar – लोकविचार
राज्य विधिमंडळाच्या पावसाळी अधिवेशनादरम्यान ठाकरे गटाचे आमदार कैलास पाटील आणि शिंदे गटाचे आमदार दिलीप लांडे यांच्यात झालेल्या शाब्दिक चकमकीची चर्चा सुरू असतानाच आता धाराशिव जिल्ह्यातील एका व्हॉट्सअॅप ग्रुपवरील कमेंटमुळे नव्या राजकीय चर्चांना उधाण आले आहे.
विधानसभेच्या पावसाळी अधिवेशनात बोलताना शिंदे गटाचे आमदार दिलीप लांडे यांनी, “तुमचा लवकरच आमच्या गटात प्रवेश होणार आहे,” असे वक्तव्य आमदार कैलास पाटील यांच्याकडे उद्देशून केल्याचे व्हिडिओमध्ये दिसून येते. त्यावर आमदार कैलास पाटील यांनी तात्काळ आक्रमक भूमिका घेत लांडे यांच्या वक्तव्याला प्रत्युत्तर दिले. या दोघांतील शाब्दिक चकमकीचा व्हिडिओ सोशल मीडियावर मोठ्या प्रमाणात व्हायरल झाला.
या घटनेनंतर धाराशिवमधील एका व्हॉट्सअॅप ग्रुपमध्ये जिल्हा परिषद अध्यक्षा तथा भाजप नेत्या सौ.अर्चना राणाजगजितसिंह पाटील यांनी “कधी आहे प्रवेश” अशी कमेंट केल्याने चर्चेला उधाण आले आहे. या एका कमेंटमुळे आ.कैलास पाटील यांच्या संभाव्य पक्षप्रवेशाबाबत पुन्हा एकदा राजकीय तर्क-वितर्कांना उधाण आले आहे.
राजकीय वर्तुळात या कमेंटचे विविध अर्थ काढले जात आहेत. काही जण याकडे केवळ हलक्याफुलक्या राजकीय टोमण्याच्या स्वरूपात पाहत आहेत, तर काही जण या कमेंटमागे राजकीय संकेत असल्याची चर्चा करत आहेत.
दरम्यान, विधानसभा अधिवेशनातील शाब्दिक चकमकीपेक्षा आता व्हॉट्सअॅपवरील या एका कमेंटचीच धाराशिवच्या राजकीय वर्तुळात अधिक चर्चा रंगली असून, आगामी काळात या चर्चेला कोणते राजकीय वळण मिळते, याकडे सर्वांचे लक्ष लागले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
