पळसप येथील उबाठा शिवसेना उपसरपंच यांच्यासह लहुजी शक्ती सेनेच्या प्रमुख कार्यकर्त्यांचा भाजपमध्ये जाहीर प्रवेश

पळसप येथील उबाठा शिवसेना उपसरपंच यांच्यासह लहुजी शक्ती सेनेच्या प्रमुख कार्यकर्त्यांचा भाजपमध्ये जाहीर प्रवेश
धाराशिव दि.२०(प्रतिनिधी):धाराशिव तालुक्यातील पळसप येथील उबाठा शिवसेना पक्षाचे उपसरपंच राम (नाना) लाकाळ, माजी सरपंच दगडू (भाऊ) लाकाळ तसेच ग्रामपंचायत सदस्य मंगेश माळी व मोतीचंद फुटाणे यांनी मुख्यमंत्री देवेंद्र फडणवीस यांच्या सक्षम नेतृत्वावर आणि भाजपा महायुती सरकारच्या लोकाभिमुख धोरणांवर विश्वास व्यक्त करत आमदार राणाजगजितसिंह पाटील यांच्या हस्ते भारतीय जनता पार्टीत जाहीर प्रवेश केला.
याचवेळी सामाजिक समता, संघटनात्मक बळकटीकरण आणि सर्वसमावेशक विकासाच्या विचारांनी प्रेरित होऊन लहुजी शक्ती सेनेचे मराठवाडा संघटक सर्जेराव शिंदे, जिल्हा उपाध्यक्ष अमोल कांबळे यांच्यासह बालाजी कांबळे, गोरोबा ताटे, रवी लोंढे, ओंकार पेठे व सुनील शिंदे यांनीही भाजपमध्ये प्रवेश करून पक्षाच्या विचारधारेला पाठिंबा दर्शविला.
या सर्व नव्याने प्रवेश केलेल्या कार्यकर्त्यांचे आमदार राणाजगजितसिंह पाटील यांनी भाजप परिवारात स्वागत करून पुढील वाटचालीस शुभेच्छा दिल्या. या प्रवेशामुळे पळसप व परिसरात भारतीय जनता पार्टीचे संघटन अधिक मजबूत होत असून, तळागाळातील कार्यकर्त्यांचा भाजपा महायुती सरकारच्या विकासाच्या राजकारणावर वाढता विश्वास अधोरेखित होत आहे.
केंद्र व राज्य सरकारच्या माध्यमातून राबविण्यात येणाऱ्या विविध विकास योजनांचा लाभ सर्वसामान्य नागरिकांपर्यंत पोहोचवण्यासाठी नव्याने पक्षात आलेले कार्यकर्ते प्रभावी योगदान देतील, असा विश्वास यावेळी व्यक्त करण्यात आला.
या प्रवेशप्रसंगी संपतराव डोके, विजय हाऊळ, प्रवीण माळी, प्रदीप शिंदे, अशोक वीर यांच्यासह प्रमुख कार्यकर्ते उपस्थित होते.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786