NCMC स्मार्ट कार्डसाठी १ सप्टेंबरपर्यंत मुदतवाढ; ज्येष्ठ नागरिक व महिलांना दिलासा – परिवहन मंत्री प्रताप सरनाईक
मुंबई लोकविचार
एसटी प्रवासातील शासनाच्या विविध प्रवासी सवलतींसाठी NCMC स्मार्ट कार्ड अनिवार्य करण्याच्या निर्णयाला राज्य शासनाने १ सप्टेंबर २०२६ पर्यंत मुदतवाढ दिली आहे. अनेक ज्येष्ठ नागरिक आणि महिलांना अद्याप स्मार्ट कार्ड प्राप्त झाले नसल्याने त्यांची गैरसोय टाळण्यासाठी हा निर्णय घेण्यात आला असल्याची माहिती परिवहन मंत्री तथा महाराष्ट्र राज्य मार्ग परिवहन महामंडळाचे अध्यक्ष प्रताप सरनाईक यांनी दिली.
राज्य शासनामार्फत अमृत ज्येष्ठ नागरिकांना मोफत प्रवास, तर ज्येष्ठ नागरिक आणि महिलांना एसटी प्रवासात ५० टक्के भाडे सवलत दिली जाते. या सवलती अधिक पारदर्शक आणि तंत्रज्ञानाधारित पद्धतीने उपलब्ध करून देण्यासाठी १ ऑगस्टपासून NCMC स्मार्ट कार्ड अनिवार्य करण्याचा निर्णय घेण्यात आला होता.
मात्र, राज्यभरातील अनेक पात्र प्रवाशांनी स्मार्ट कार्डसाठी नोंदणी केली असली तरी त्यांना अद्याप प्रत्यक्ष कार्ड मिळालेले नाही. त्यामुळे पात्र प्रवासी केवळ कार्ड उपलब्ध नसल्यामुळे शासनाच्या सवलतींपासून वंचित राहू नयेत, यासाठी NCMC स्मार्ट कार्ड अनिवार्य करण्याच्या अंमलबजावणीस १ सप्टेंबरपर्यंत मुदतवाढ देण्यात आली आहे.
या निर्णयामुळे अमृत ज्येष्ठ नागरिक, ज्येष्ठ नागरिक आणि महिला प्रवाशांना मोठा दिलासा मिळणार असून, वाढीव मुदतीचा लाभ घेऊन सर्व पात्र प्रवाशांनी NCMC स्मार्ट कार्डची प्रक्रिया लवकरात लवकर पूर्ण करावी, असे आवाहन परिवहन मंत्री प्रताप सरनाईक यांनी केले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
