स्थानिक गुन्हे शाखेची मोठी कारवाई…येडशीत लाखोंच्या मुद्देमालासह विदेशी दारूचा मोठा साठा जप्त
धाराशिव लोकविचार
जिल्ह्यात अवैध दारू तस्करीविरोधात स्थानिक गुन्हे शाखेने मोठी कारवाई करत तब्बल 6 लाख 34 हजार 600 रुपयांचा मुद्देमाल जप्त केला आहे. येडशी येथील छत्रपती शिवाजी महाराज चौक परिसरात सापळा रचून पोलिसांनी इनोव्हा कारसह विदेशी दारूचा साठा पकडला. या कारवाईमुळे अवैध धंदे करणाऱ्यांमध्ये मोठी खळबळ उडाली आहे.
दि. 21 मे 2026 रोजी स्थानिक गुन्हे शाखेचे पथक जिल्ह्यात पेट्रोलिंग करत असताना गुप्त बातमीदारामार्फत माहिती मिळाली की, एमएच 15 बीएक्स 6820 क्रमांकाच्या इनोव्हा कारमधून विदेशी दारूची चोरटी वाहतूक होत आहे. मिळालेल्या माहितीच्या आधारे पोलिसांनी येडशी येथील छत्रपती शिवाजी महाराज चौक परिसरात सापळा रचला.सायंकाळी सुमारे 5.30 वाजता संशयित कार दिसताच पोलिसांनी वाहन थांबवून चौकशी केली.
चालकाने आपले नाव सुभाष भिमराव ऊर्फ लाला काळे (रा. कन्हेरवाडी, ता. कळंब) असे सांगितले. तर वाहनात बसलेल्या दुसऱ्या व्यक्तीने आपले नाव दादा रामा काळे (रा. जुना बस डेपो परिसर, धाराशिव) असे सांगितले.वाहनाची तपासणी केली असता कारमध्ये विदेशी दारूचे बॉक्स आढळून आले. पोलिसांनी तात्काळ कारसह विदेशी दारू असा एकूण 6 लाख 34 हजार 600 रुपयांचा मुद्देमाल जप्त केला. याप्रकरणी दोन्ही आरोपींविरोधात महाराष्ट्र दारूबंदी कायद्यान्वये गुन्हा दाखल करण्यात आला आहे.
ही कारवाई पोलीस अधीक्षक रितु खोखर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद ईज्जपवार, सपोनि अमोल मोरे, पोह बळीराम शिंदे, अमोल चव्हाण व चालक पोकॉ विनायक दहीहांडे यांच्या पथकाने पार पाडली.
लोकविचार सत्य शोधून लिहिण्याची ताकद संपादक अमजद सय्यद 8390088786
