धाराशिव जिल्हा परिषदेत महायुतीचे वर्चस्व अर्चना पाटील अध्यक्षपदासाठी तर उषाताई गायकवाड उपाध्यक्षपदासाठी रिंगणात
महायुतीच्या पदाधिकाऱ्यांची मोठी उपस्थिती; एकदिलाने उमेदवारी अर्ज दाखल करत शक्तिप्रदर्शन
धाराशिव | लोकमदत न्यूज
धाराशिव जिल्हा परिषद अध्यक्ष व उपाध्यक्ष पदाच्या निवडीसाठी महायुतीने आपली ताकद दाखवत आज अधिकृत उमेदवारी अर्ज दाखल केले. अध्यक्षपदासाठी भारतीय जनता पक्षाच्या वतीने सौ. अर्चना राणाजगजितसिंह पाटील तर उपाध्यक्षपदासाठी शिवसेना शिंदे गट सौ. उषाताई रवींद्र गायकवाड यांनी उमेदवारी अर्ज सादर केला.
उमेदवारी अर्ज दाखल करताना महायुतीतील भाजप, शिवसेना आणि राष्ट्रवादी काँग्रेस या तिन्ही घटक पक्षांच्या पदाधिकाऱ्यांची आणि कार्यकर्त्यांची मोठी उपस्थिती होती. यावेळी कार्यकर्त्यांमध्ये उत्साहाचे वातावरण दिसून आले. एकदिलाने दाखल करण्यात आलेल्या या उमेदवारीमुळे जिल्ह्यात महायुतीची भक्कम एकजूट पुन्हा एकदा अधोरेखित झाल्याचे चित्र पाहायला मिळाले.
उमेदवारी अर्ज दाखल करण्यासाठी महायुतीचे युवा नेते मल्हार राणाजगजितसिंह पाटील, भाजप जिल्हाध्यक्ष दत्ताभाऊ कुलकर्णी, महेंद्र धुरगुडे, किरण गायकवाड, शिवसेना शिंदे गटाचे गटनेते संदेश उर्फ विकी चव्हाण, सौ. सुवर्णा सतीश पाटील, धनंजय सावंत, सतीश दंडनाईक यांच्यासह महायुतीतील अनेक पदाधिकारी व कार्यकर्ते मोठ्या संख्येने उपस्थित होते.
यावेळी उपस्थित पदाधिकाऱ्यांनी महायुतीच्या उमेदवारांच्या विजयाचा विश्वास व्यक्त केला. जिल्हा परिषदेत महायुतीचे बहुमत असल्यामुळे अध्यक्ष व उपाध्यक्ष पदाच्या निवडणुकीत महायुतीचे उमेदवार विजयी होतील, असा दावा पदाधिकाऱ्यांकडून करण्यात आला.
महायुतीच्या एकत्रित शक्तिप्रदर्शनामुळे जिल्हा परिषद राजकारणात आता पुढील घडामोडींकडे सर्वांचे लक्ष लागले आहे.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
