पदवीधर मतदारसंघात डॉ. प्रतापसिंह पाटील यांचा दणदणीत विजय; महायुतीच्या सतीश चव्हाण यांचा १८ हजार १२४ मतांनी पराभव
८५ हजार ८७६ मतांचा कौल; ४५ तासांहून अधिक काळ चाललेल्या मतमोजणीनंतर विजयावर शिक्कामोर्तब
छत्रपती संभाजीनगर | लोकविचार
विधान परिषदेच्या औरंगाबाद विभाग पदवीधर मतदारसंघाच्या निवडणुकीत राष्ट्रवादी काँग्रेस पक्ष – शरदचंद्र पवार पक्षाचे उमेदवार डॉ. प्रतापसिंह वेदप्रकाश पाटील यांनी १८ हजार १२४ मतांच्या फरकाने विजय मिळवला. त्यांनी राष्ट्रवादी काँग्रेस पक्षाचे उमेदवार सतीश भानुदासराव चव्हाण यांचा पराभव केला. डॉ. पाटील यांना एकूण ८५ हजार ८७६ मते, तर चव्हाण यांना ६७ हजार ७५२ मते मिळाली. तब्बल ४५ तासांहून अधिक काळ चाललेल्या मतमोजणीनंतर गुरुवारी, २९ ऑक्टोबर रोजी पहाटे ५ वाजून १० मिनिटांनी निवडणूक निर्णय अधिकारी तथा विभागीय आयुक्त जी. श्रीकांत यांनी डॉ. पाटील यांना विजयी घोषित करून प्रमाणपत्र प्रदान केले.
या निकालामुळे पदवीधर मतदारसंघातील राजकीय समीकरणांची चर्चा सुरू झाली आहे. आठ जिल्ह्यांतील पदवीधर मतदारांनी दिलेला कौल या निवडणुकीत महत्त्वाचा ठरला. डॉ. प्रतापसिंह पाटील यांच्या विजयाने त्यांच्या समर्थकांमध्ये उत्साहाचे वातावरण निर्माण झाले असून, त्यांच्या पुढील राजकीय वाटचालीकडेही लक्ष लागले आहे.
पहिल्या पसंतीत आघाडी, मतहस्तांतरणानंतर विजय
छत्रपती संभाजीनगर येथील चिकलठाणा एमआयडीसी परिसरातील रेसोनेट लॉजिस्टिक्स एलएलपी येथे मतमोजणी प्रक्रिया पार पडली. छत्रपती संभाजीनगर, जालना, बीड, परभणी, हिंगोली, नांदेड, लातूर आणि धाराशिव या आठ जिल्ह्यांतील ८४२ मतदान केंद्रांवर मतदान झाले होते. या निवडणुकीत एकूण ४१ उमेदवार रिंगणात होते. मतमोजणीसाठी ७० टेबलांची व्यवस्था करण्यात आली होती.
पहिल्या पसंतीच्या मतमोजणीत डॉ. प्रतापसिंह पाटील यांना ७३ हजार ९३१, तर सतीश चव्हाण यांना ६० हजार ७६८ मते मिळाली. अपक्ष उमेदवार रविराज उर्फ अण्णासाहेब साबळे-पाटील यांना १९ हजार ८३५, तर दिलीप घुगे यांना ८ हजार ४३९ मते मिळाली. मात्र, विजयासाठी आवश्यक असलेला ८८ हजार ५५८ मतांचा कोटा कोणत्याही उमेदवाराला गाठता आला नाही.
त्यामुळे निवडणूक नियमांनुसार कमी मते मिळालेल्या उमेदवारांना टप्प्याटप्प्याने वगळून त्यांच्या मतपत्रिकांवरील पुढील उपलब्ध पसंतीक्रमानुसार मतहस्तांतरण करण्यात आले. एकूण ४१ उमेदवारांपैकी ३९ उमेदवार वगळल्यानंतर डॉ. पाटील आणि सतीश चव्हाण हे दोन उमेदवार अंतिम टप्प्यात राहिले. मतहस्तांतरणाच्या प्रक्रियेनंतर डॉ. पाटील यांना ८५ हजार ८७६, तर चव्हाण यांना ६७ हजार ७५२ मते मिळाली. अखेर १८ हजार १२४ मतांच्या फरकाने डॉ. पाटील यांच्या विजयावर शिक्कामोर्तब झाले.
अधिकारी-कर्मचाऱ्यांच्या समन्वयातून मतमोजणी पूर्ण
मंगळवार, २७ ऑक्टोबर रोजी सकाळी ८ वाजता सुरू झालेली मतमोजणी गुरुवार, २९ ऑक्टोबर रोजी पहाटे अंतिम निकाल जाहीर होईपर्यंत सुरू होती. मतपत्रिकांची पडताळणी, वर्गीकरण, पहिल्या पसंतीच्या मतांची मोजणी, उमेदवारांची वगळणी, मतहस्तांतरण आणि अंतिम आकडेवारीची तपासणी अशा विविध टप्प्यांतून ही प्रक्रिया पूर्ण करण्यात आली.
विभागीय आयुक्त तथा निवडणूक निर्णय अधिकारी जी. श्रीकांत आणि निवडणूक निरीक्षक माधवी खोडे-चवरे यांच्या देखरेखीखाली मतमोजणी झाली. संबंधित जिल्ह्यांचे जिल्हाधिकारी, जिल्हा परिषदेचे मुख्य कार्यकारी अधिकारी आणि निवडणूक प्रक्रियेशी संबंधित अधिकारी यावेळी उपस्थित होते.
डॉ. प्रतापसिंह पाटील यांच्या विजयामुळे औरंगाबाद विभाग पदवीधर मतदारसंघात नवे राजकीय पर्व सुरू झाले आहे. पदवीधर मतदारांनी दिलेल्या कौलानंतर आता या विश्वासाला त्यांच्या आगामी कामकाजातून कसा प्रतिसाद मिळतो, याकडे मतदारांचे लक्ष राहणार आहे.
लोकविचार सत्य शोधून लिहिण्याची ताकद संपादक अमजद सय्यद 8390088786











