धाराशिवमध्ये कोरडा दुष्काळ जाहीर करा; शेतकऱ्यांना तातडीने मदत द्या –आ.प्रा. डॉ. तानाजीराव सावंत
धाराशिव | लोकविचार
धाराशिव जिल्ह्यात यावर्षी अपेक्षित पाऊस न झाल्याने अनेक भागांतील खरीप पिकांचे मोठ्या प्रमाणात नुकसान झाले असून शेतकरी आर्थिक संकटात सापडला आहे. पावसाअभावी पिण्याचे पाणी, जनावरांचा चारा तसेच ग्रामीण भागातील रोजगाराचा प्रश्नही गंभीर होत चालला असून, या पार्श्वभूमीवर धाराशिव जिल्ह्यात तातडीने कोरडा दुष्काळ जाहीर करावा, अशी मागणी आ.प्रा. डॉ. तानाजीराव सावंत यांनी केली आहे.
याबाबत त्यांनी मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्याकडे पत्राद्वारे विनंती केली आहे.
जिल्ह्यातील परिस्थितीचा गांभीर्याने विचार करून शेतकऱ्यांना पीक नुकसानभरपाई, दुष्काळी अनुदान, वीजबिलात सवलत, पिण्याच्या पाण्याची व्यवस्था, जनावरांसाठी चारा तसेच रोजगार हमीची कामे मोठ्या प्रमाणात सुरू करावीत, अशी मागणी त्यांनी केली आहे.
पावसाअभावी शेतीचे मोठे नुकसान झाल्याने शेतकरी आणि ग्रामीण जनतेला या संकटातून बाहेर काढण्यासाठी शासनाने केवळ आश्वासनांपुरते मर्यादित न राहता तातडीने ठोस निर्णय घेऊन प्रत्यक्ष मदत उपलब्ध करून द्यावी, अशी अपेक्षाही डॉ. सावंत यांनी व्यक्त केली आहे.
आता शासन धाराशिव जिल्ह्यातील दुष्काळी परिस्थितीची दखल घेऊन कोणता निर्णय घेते, याकडे जिल्ह्यातील शेतकरी आणि ग्रामीण जनतेचे लक्ष लागले आहे.
Lokvichar – लोकविचार सत्य शोधून लिहिण्याची ताकद संपादक अमजद सय्यद 083900 88786
