नागरिकांच्या आवाहनाला भाजप नगरसेवकांचा तत्काळ प्रतिसाद जुना उपळा रोडवरील जीवघेणा खड्डा काँक्रीटने बुजवला
धाराशिव | लोकविचार
धाराशिव शहरातील जुना उपळा रोड परिसरातील ५ ते ६ फूट खोल खड्ड्याबाबत दोन दिवसांपूर्वी नागरिकांच्या संतप्त भावना आणि उपरोधिक होर्डिंगच्या माध्यमातून प्रश्न उपस्थित केला होता. या वृत्ताची तसेच सोशल मीडियावर नागरिकांनी व्हायरल केलेल्या खड्ड्याच्या फोटोची दखल घेत धाराशिव नगरपरिषदेतील भाजपचे नगरसेवक राहुल काकडे व आकाश तावडे यांनी तत्काळ घटनास्थळी जाऊन पाहणी केली.
महत्त्वाचे म्हणजे, संबंधित रस्ता नॅशनल हायवे असून तो आयआरबी कंपनीच्या अखत्यारित आहे. या रस्त्याचा नगरपरिषद प्रशासनाशी थेट संबंध नाही. मात्र आपण शहराचे लोकप्रतिनिधी आहोत आणि नागरिकांची गैरसोय तसेच अपघात टाळणे ही आपली जबाबदारी असल्याच्या भावनेतून नगरसेवक राहुल काकडे व आकाश तावडे यांनी या प्रश्नात तातडीने लक्ष घातले.
घटनास्थळी पाहणी केल्यानंतर दोन्ही नगरसेवकांनी संबंधित ठेकेदाराशी संपर्क साधून खड्डा तातडीने बुजविण्याची विनंती केली. नागरिकांच्या सुरक्षिततेचा प्रश्न लक्षात घेऊन नगरसेवक काकडे आणि तावडे यांनी केलेली मागणी याचा संबंधित ठेकेदारानेही तत्काळ दखल घेतली आणि खड्डा काँक्रीटच्या माध्यमातून बुजविण्यात आला. त्यामुळे या मार्गावरून ये-जा करणाऱ्या नागरिकांना होणारी गैरसोय दूर झाली असून, संभाव्य छोटे-मोठे अपघात टाळण्यास मदत झाली आहे.
नागरिकांच्या आवाहनाला तत्काळ प्रतिसाद
दोन दिवसांपूर्वी या परिसरातील नागरिकांनी खड्ड्याचे फोटो सोशल मीडियावर व्हायरल करून प्रशासन आणि लोकप्रतिनिधींचे लक्ष वेधले होते. नागरिकांच्या या आवाहनाला प्रतिसाद देत नगरसेवक राहुल काकडे व आकाश तावडे यांनी वेळ न दवडता प्रत्यक्ष घटनास्थळी जाऊन पाहणी केली आणि संबंधित यंत्रणेशी समन्वय साधत प्रश्न मार्गी लावला.
यावेळी “रस्ता कोणत्याही यंत्रणेच्या अखत्यारित असला तरी नागरिकांची सुरक्षितता आणि गैरसोय हा सर्वांचाच विषय आहे,” या भावनेतून आपण काम करत असल्याचे नगरसेवक राहुल काकडे यांनी स्पष्ट केले.
धाराशिवकरांच्या प्रत्येक नागरिकाच्या हक्कासाठी नगरपरिषद प्रशासन आणि लोकप्रतिनिधी सज्ज आहेत, असेही त्यांनी सांगितले.
दरम्यान, खड्डा बुजविण्याची तातडीने कार्यवाही झाल्याने परिसरातील नागरिकांनी समाधान व्यक्त केले असून, नगरसेवक राहुल काकडे आणि आकाश तावडे यांनी नागरिकांच्या प्रश्नाची तत्काळ दखल घेतल्याबद्दल त्यांचे आभार मानले आहेत.
लोकविचार सत्य शोधून लिहिण्याची ताकद संपादक अमजद सय्यद 8390088786
