मुख्य रस्त्यावरील अतिक्रमणे ७ सप्टेंबरपर्यंत हटवा; अन्यथा ८ सप्टेंबरपासून थेट कारवाई!
धाराशिव लोकविचार
शहरातील प्रमुख रस्ते आणि पदपथांवरील फळविक्रेते, हातगाड्या व पानटपऱ्यांच्या अतिक्रमणाविरोधात नगरपरिषद प्रशासनाने कठोर भूमिका घेतली आहे. संबंधितांनी ७ सप्टेंबर २०२६ पूर्वी स्वतःहून अतिक्रमणे हटवावीत, अन्यथा ८ सप्टेंबरपासून कोणतीही पूर्वसूचना न देता कारवाई करण्याचा इशारा मुख्याधिकारी यांनी दिला आहे.
छत्रपती शिवाजी महाराज चौक, तुळजाभवानी व्यापारी संकुल, एस.टी. स्टँड परिसर ते सेंट्रल बिल्डिंग या प्रमुख मार्गांवर अतिक्रमणामुळे वाहतूक कोंडी आणि नागरिकांची गैरसोय होत असल्याचे प्रशासनाने म्हटले आहे.
रस्त्यांची रुंदी कमी झाल्याने शाळकरी मुले, ज्येष्ठ नागरिक तसेच रुग्णवाहिकांना अडथळ्यांचा सामना करावा लागत असल्याच्या तक्रारी प्रशासनाकडे प्राप्त झाल्या आहेत.मुदत संपल्यानंतर सार्वजनिक जागेवर किंवा मुख्य रस्त्यावर अतिक्रमण आढळल्यास संबंधितांवर दंडात्मक व कायदेशीर कारवाई केली जाणार आहे.
तसेच हातगाड्या, टपऱ्या व संबंधित साहित्य जप्त करण्याची कारवाई करण्यात येईल. कारवाईदरम्यान साहित्याचे नुकसान झाल्यास त्याची जबाबदारी संबंधित अतिक्रमणधारकाची राहील, असा स्पष्ट इशारा नगरपरिषद प्रशासनाने दिला आहे.
शहरातील प्रमुख रस्ते वाहतूकमुक्त आणि मोकळे ठेवण्यासाठी संबंधितांनी मुदतीपूर्वी अतिक्रमणे स्वतःहून हटवून प्रशासनास सहकार्य करावे, असे आवाहन मुख्याधिकारी, नगर परिषद धाराशिव यांनी केले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
