अमृत 2.0 मुळे नळदुर्गचा पाणीप्रश्न मार्गी भवानीनगर-रहिमनगरात विकासकामांचा वेग!
आमदार रानाजगजितसिंह पाटील यांच्या पुढाकारातून शहरात पाणीपुरवठा योजनेचा अंतिम टप्पा नगरपालिकेचे सूक्ष्म नियोजन, नागरिकांमध्ये समाधान
नळदुर्ग | प्रतिनिधी (अझहर शेख) तुळजापूर तालुक्यातील नळदुर्ग शहरात सध्या विकासकामांचा झपाट्याने वेग वाढलेला असून, केंद्र सरकारच्या ‘अमृत योजना 2.0’ अंतर्गत पाणीपुरवठा व नागरी सुविधांच्या कामांनी अंतिम टप्पा गाठला आहे. भवानीनगर, रहिमनगर, बी.के. हॉल परिसर आणि राणे प्लॉटिंग भागात सुरू असलेल्या या कामांमुळे शहराचा दीर्घकाळ प्रलंबित असलेला पाणीप्रश्न आता कायमस्वरूपी निकाली निघण्याची चिन्हे दिसत आहेत.नळदुर्ग शहराच्या सर्वांगीण विकासासाठी आमदार रानाजगजितसिंह पाटील यांनी सातत्याने पाठपुरावा करत अमृत योजनेचा दुसरा टप्पा प्रभावीपणे राबवण्यावर भर दिला आहे. वाढत्या लोकसंख्येचा विचार करून आधुनिक व शाश्वत पाणीपुरवठा व्यवस्था उभारण्याचा या योजनेतून प्रयत्न केला जात आहे. यामुळे केवळ नियमित पाणीपुरवठाच नव्हे, तर भविष्यातील गरजाही पूर्ण होणार आहेत.दरम्यान, नळदुर्ग नगरपालिकेचे नगराध्यक्ष बसवराज आप्पा धरणे यांच्या नेतृत्वाखाली या योजनेचे सूक्ष्म नियोजन करण्यात आले आहे. शहराच्या विस्तारणाऱ्या भागांमध्ये मूलभूत सुविधा पोहोचवण्यावर विशेष भर देण्यात येत आहे. बांधकाम सभापती पांडू तात्या पुदाले हे स्वतः कामाच्या ठिकाणी उपस्थित राहून कामाची पाहणी करत असून, दर्जेदार कामासाठी प्रशासनाला सतत सूचना देत आहेत.सध्या भवानीनगर व रहिमनगर भागात मोठ्या प्रमाणावर खोदकाम, पाईपलाईन टाकणे व नवीन पाणी टाकीशी जोडणी करण्याचे काम युद्धपातळीवर सुरू आहे. दिवस-रात्र सुरू असलेल्या या कामांमुळे प्रकल्पाची अंमलबजावणी वेगाने होत आहे.अनेक वर्षांपासून पाण्याच्या समस्येला सामोरे जाणाऱ्या नागरिकांसाठी ही योजना दिलासादायक ठरत आहे. परिसरातील नागरिकांनी या विकासकामांचे स्वागत केले असून, लोकप्रतिनिधी व प्रशासनाच्या कार्यपद्धतीबद्दल समाधान व्यक्त केले आहे.“शहरातील प्रत्येक भागाला मूलभूत सुविधा मिळाल्याशिवाय विकास पूर्ण होणार नाही. अमृत 2.0 योजनेमुळे भवानीनगर आणि रहिमनगरच्या विकासाला नवी दिशा मिळेल,” असे मत नगरपालिका प्रशासनाने व्यक्त केले आहे.एकूणच, नियोजनबद्ध अंमलबजावणी आणि लोकप्रतिनिधींच्या पुढाकारामुळे नळदुर्ग शहराचा पाणीप्रश्न सुटण्याच्या मार्गावर असून, येत्या काळात शहराचा कायापालट होण्याची चिन्हे स्पष्ट दिसत आहेत.
सर्वसामान्य लोकविचार सत्य शोधून लिहिण्याची ताकद संपादक अमजद सय्यद 8390088786
