कळंबमध्ये अनैतिक देहव्यवसायावर पोलिसांचा छापा प्रभात लॉजमधून दोन महिलांची सुटका, तिघांविरुद्ध गुन्हा दाखल
कळंब लोकविचार
कळंब शहरातील प्रभात लॉजमध्ये सुरू असलेल्या कथित अनैतिक देहव्यवसायावर कळंब पोलिसांनी धाड टाकत दोन महिलांची सुटका केली असून या प्रकरणी तिघांविरुद्ध मानवी अनैतिक व्यवसाय प्रतिबंधक अधिनियमासह भारतीय न्याय संहितेच्या विविध कलमांन्वये गुन्हा दाखल करण्यात आला आहे.
पोलीस अधीक्षक श्रीमती रितु खोखर, अपर पोलीस अधीक्षक सचिन पांडकर आणि उपविभागीय पोलीस अधिकारी संजय पवार यांच्या मार्गदर्शनाखाली कळंब पोलीस ठाण्याचे पोलीस निरीक्षक शकील शेख यांच्या पथकाने १३ जुलै रोजी अवैध धंद्यांविरोधात विशेष मोहीम राबविली होती.
गस्ती दरम्यान पोलीस निरीक्षक शकील शेख यांना गुप्त बातमीदारामार्फत प्रभात लॉजमध्ये काही महिलांकडून वेश्या व्यवसाय करून घेत असल्याची माहिती मिळाली. माहितीची खातरजमा करण्यासाठी पोलिसांनी बनावट ग्राहक पाठविला. माहिती खरी असल्याचे स्पष्ट होताच सायंकाळी साडेचार वाजण्याच्या सुमारास लॉजवर छापा टाकण्यात आला.
या कारवाईत दोन महिलांची सुटका करण्यात आली. महिलांची चौकशी केली असता आरोपी समाधान महादेव कांबळे (रा. इंदिरानगर, कळंब), अमोल राजाभाऊ सोनटक्के (वय ३६, रा. हासेगाव, ता. कळंब) आणि नरेश खेमराज जोशी (रा. बसस्थानकासमोर, कळंब) यांच्या सांगण्यावरून त्यांना व्यावसायिक उद्देशाने आश्रय देऊन लैंगिक शोषणासाठी प्रवृत्त करण्यात येत असल्याची माहिती समोर आली. तसेच आरोपी या व्यवसायातून स्वतःची उपजीविका करत असल्याचेही तपासात निष्पन्न झाले.
पोलिसांनी आरोपींना ताब्यात घेत त्यांच्या ताब्यातील मोबाईल फोन, नोंदवही (रजिस्टर), रोख ६,२०० रुपये आणि निरोधाची पाकिटे असा एकूण १६,२०० रुपयांचा मुद्देमाल जप्त केला.
या प्रकरणी आरोपींविरुद्ध गुन्हा क्रमांक २९८/२०२६ अन्वये बीएनएसच्या कलम १४३(३), १४४(२) तसेच मानवी अनैतिक व्यवसाय (प्रतिबंधक) अधिनियमातील कलम ३, ४, ५ व ६ अंतर्गत तामलवाडी पोलीस ठाण्यात गुन्हा दाखल करण्यात आला असून पुढील तपास पोलीस करत आहेत.
पोलीस अधीक्षक श्रीमती रितु खोखर, अपर पोलीस अधीक्षक सचिन पांडकर आणि उपविभागीय पोलीस अधिकारी संजय पवार यांच्या मार्गदर्शनाखाली कळंब पोलीस ठाण्याच्या पथकाने ही कारवाई यशस्वीपणे पार पाडली.
Lokvichar – लोकविचार सत्य शोधून लिहिण्याची ताकद संपादक अमजद सय्यद 083900 88786
