शरदचंद्र पवार यांचा धाराशिव नियोजित दुष्काळ पाहणी दौरा स्थगित; बारामती-पुण्यातील पावसाच्या परिस्थितीमुळे निर्णय
२ व ३ नोव्हेंबरचा दौरा रद्द; परंडा, बार्शी, कळंब आणि केजमधील दुष्काळग्रस्त शेतकऱ्यांशी होणारा संवाद तूर्तास पुढे ढकलला
धाराशिव लोकविचार
मराठवाड्यासह धाराशिव जिल्ह्यातील दुष्काळग्रस्त शेतकऱ्यांच्या व्यथा जाणून घेण्यासाठी ज्येष्ठ नेते तथा खासदार पद्मविभूषण शरदचंद्र पवार यांचा २ व ३ नोव्हेंबर रोजी नियोजित असलेला दुष्काळ पाहणी दौरा स्थगित करण्यात आला आहे. बारामती तसेच पुणे जिल्ह्यात वाढत असलेल्या पावसाची परिस्थिती लक्षात घेऊन हा निर्णय घेण्यात आल्याची माहिती राष्ट्रवादी काँग्रेस पक्ष (शरदचंद्र पवार) पक्षाचे धाराशिव जिल्हाध्यक्ष तथा विधान परिषद आमदार डॉ. प्रतापसिंह पाटील यांच्या वतीने देण्यात आली आहे.
शरदचंद्र पवार यांच्या नियोजित दौऱ्यामुळे धाराशिव आणि बीड जिल्ह्यातील दुष्काळग्रस्त भागातील शेतकऱ्यांना आपल्या व्यथा थेट मांडण्याची संधी मिळणार होती. मात्र, दौरा स्थगित झाल्याने शेतकऱ्यांशी होणारा संवाद आणि दुष्काळी परिस्थितीची प्रत्यक्ष पाहणी तूर्तास पुढे ढकलण्यात आली आहे.
२ नोव्हेंबर रोजी दौऱ्याच्या पहिल्या दिवशी शरदचंद्र पवार हे परंडा आणि बार्शी तालुक्यातील दुष्काळग्रस्त भागांची पाहणी करणार होते. शेतकऱ्यांच्या बांधावर जाऊन खरीप पिकांचे नुकसान, पाणीटंचाई, जनावरांच्या चाऱ्याची समस्या तसेच शेतीसमोरील आर्थिक संकटाची माहिती ते जाणून घेणार होते. त्यानंतर त्यांचा धाराशिव येथे मुक्काम नियोजित होता.
तर ३ नोव्हेंबर रोजी कळंब आणि केज तालुक्यातील दुष्काळग्रस्त भागांना भेट देऊन तेथील परिस्थितीचा आढावा घेण्याचे नियोजन होते. स्थानिक शेतकरी, शेतकरी संघटनांचे प्रतिनिधी आणि नागरिकांशी संवाद साधून त्यांच्या समस्या जाणून घेण्यावर या दौऱ्यात भर देण्यात येणार होता.
यंदा पावसाने ओढ दिल्यामुळे धाराशिव जिल्ह्यासह मराठवाड्यातील शेतकरी गंभीर संकटात सापडले आहेत. खरीप हंगामातील पिकांचे मोठे नुकसान झाले असून पिण्याचे पाणी, जनावरांचा चारा आणि आगामी रब्बी हंगामाची तयारी यांसारखे प्रश्न गंभीर बनले आहेत. अशा परिस्थितीत खा.शरदचंद्र पवार यांच्या दौऱ्याकडे शेतकरी आणि राजकीय वर्तुळाचे लक्ष लागले होते.
दरम्यान, बारामती तसेच पुणे जिल्ह्यात वाढत असलेल्या पावसाची परिस्थिती लक्षात घेता आदरणीय पद्मविभूषण खासदार शरदचंद्र पवार यांचा नियोजित दुष्काळ पाहणी दौरा स्थगित करण्यात आल्याचे आवाहन डॉ. प्रतापसिंह पाटील यांच्या वतीने करण्यात आले आहे. सर्व पदाधिकारी, कार्यकर्ते, शेतकरी बांधव आणि संबंधितांनी याची नोंद घ्यावी, असेही त्यांनी स्पष्ट केले आहे.
दुष्काळाच्या तीव्र संकटात सापडलेल्या धाराशिव जिल्ह्यातील शेतकऱ्यांना या दौऱ्यातून दिलासा मिळण्याची अपेक्षा होती. आता हा दौरा पुन्हा कधी आयोजित केला जाणार, याबाबत शेतकरी आणि कार्यकर्त्यांमध्ये उत्सुकता निर्माण झाली आहे.
लोकविचार सत्य शोधून लिहिण्याची ताकद संपादक अमजद सय्यद 8390088786











