नळदुर्गमध्ये गुटखा तस्करीचा भंडाफोड! ‘मकोका’ची मागणी
मुख्य सूत्रधार अजूनही फरार
नळदुर्ग प्रतिनिधी, (अझहर शेख )
धाराशिव जिल्ह्यातील नळदुर्ग येथे पोलिसांनी मोठी कारवाई करत गुटखा तस्करीचे रॅकेट उघडकीस आणले आहे. या प्रकरणात ३ आरोपींना अटक करण्यात आली असून, न्यायालयाने त्यांना पोलीस कोठडी सुनावली आहे. मात्र, या प्रकरणातील मुख्य सूत्रधार इंद्रजीतसिंह उर्फ मिटू ठाकूर अजूनही फरार आहे.
आमदार सुरेश धस यांचा इशारा: “अधिवेशनात आवाज उठवणार!”
या प्रकरणाचे गांभीर्य लक्षात घेऊन आमदार सुरेश धस यांनी आक्रमक भूमिका घेतली आहे. ते म्हणाले:
“हे केवळ गुटखा तस्करीचे प्रकरण नसून एक मोठे संघटित गुन्हेगारी रॅकेट आहे. पाटोदा परिसरातून ही तस्करी फोफावत आहे. या आरोपींवर ‘मकोका’ लावून सखोल तपास करावा. या रॅकेटच्या म्होरक्याला अटक होईपर्यंत मी गप्प बसणार नाही; या विषयावर आगामी विधिमंडळ अधिवेशनातही आवाज उठवला जाईल.”
पोलिसांना धमकी आणि शासकीय कामात अडथळा
कारवाई सुरू असतानाच, तुळजापूर ड्रग्स तस्करी प्रकरणातील फरार आरोपी मिटू ठाकूर आपल्या सहकाऱ्यांसह तिथे पोहोचला. “तुम्ही गाडी कशी काय पकडली? गाडी सोडून द्या, नाहीतर बघून घेतो,” अशी उघड धमकी देत त्याने पोलिसांवर दबाव आणण्याचा प्रयत्न केला आणि तिथून पळ काढला.,
नळदुर्ग हा मार्ग गुटखा आणि इतर तस्करीसाठी ‘हॉटस्पॉट’ बनत चालला आहे. या मार्गावर गाड्या ‘पास’ करून देण्यासाठी आणि संरक्षण देण्यासाठी मोठे रॅकेट सक्रिय असल्याचा संशय आहे. मिटू ठाकूर हा गेल्या १ वर्षापासून (१४ फेब्रुवारी २०२५ पासून) ड्रग्स तस्करी प्रकरणात फरार असतानाही तो उघडपणे पोलिसांना धमकावतो, यामुळे पोलीस यंत्रणेच्या कार्यक्षमतेवरही प्रश्नचिन्ह उपस्थित होत आहे.
आता पोलीस या तस्करीची पाळेमुळे खोदून काढणार का, याकडे संपूर्ण जिल्ह्याचे लक्ष लागले आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
