दुष्काळी परिस्थितीतमुळे आवाहन गणेश मंडळांनी मोठ्या मूर्तींच्या विसर्जनाची स्वतः व्यवस्था करावी – मुख्याधिकारी नीता अंधारे
धाराशिव | लोकविचार
धाराशिव जिल्ह्यातील दुष्काळी परिस्थिती लक्षात घेता यंदाच्या गणेशोत्सवात पाण्याची बचत करण्याच्या दृष्टीने धाराशिव नगरपरिषदेने विसर्जनासाठी विशेष नियोजन केले आहे. सार्वजनिक गणेश मंडळांनी मोठ्या मूर्तींच्या विसर्जनाची आपल्या स्तरावर योग्य व्यवस्था करून नगरपरिषद प्रशासनाला सहकार्य करावे, तर नागरिकांनी घरगुती गणेशमूर्तींचे विसर्जन नगरपरिषदेने उभारलेल्या कृत्रिम तलावात करावे, असे आवाहन मुख्याधिकारी नीता अंधारे यांनी केले आहे.
गणेश विसर्जनाची प्रक्रिया सुरळीत, सुरक्षित आणि पर्यावरणपूरक पद्धतीने पार पाडण्यासाठी नगरपरिषदेने विविध उपाययोजना केल्या आहेत. विसर्जन मिरवणूक मार्गावरील खड्डे बुजवून मार्ग खड्डेमुक्त करण्यात आले असून रात्रीच्या वेळी मिरवणुकीसाठी पुरेशी विद्युत व्यवस्था करण्यात आली आहे. सुरक्षेच्या दृष्टीने मिरवणूक मार्गावर सीसीटीव्ही कॅमेरेही बसविण्यात आले आहेत.
नगरपरिषदेने गणेश विसर्जनासाठी विसर्जन विहीर आणि हातलाई तलाव अशी दोन प्रमुख ठिकाणे निश्चित केली आहेत. तसेच नागरिकांच्या सोयीसाठी ‘घरगुती गणपती विसर्जन आपल्या दारी’ हा उपक्रम राबविण्यात येणार आहे. याअंतर्गत शहरातील विविध भागांत सहा टेम्पोच्या माध्यमातून घरगुती गणेशमूर्तींचे संकलन करण्यात येणार आहे. नागरिकांनी आपल्या घरगुती गणपतीचे विसर्जन फिरत्या कृत्रिम तलावात किंवा नगरपरिषदेच्या संकलन केंद्रावर करून प्रशासनाला सहकार्य करावे, असे आवाहन करण्यात आले आहे.
गणेश विसर्जनाच्या दिवशी सकाळी ८ वाजल्यापासून विसर्जन प्रक्रिया पूर्ण होईपर्यंत नगरपरिषदेचे सुमारे ७० कर्मचारी विविध ठिकाणी तैनात राहणार आहेत. विसर्जनस्थळी स्वच्छता, सुरक्षा आणि आवश्यक सुविधांची व्यवस्था करण्यात आली आहे.
जिल्ह्यातील दुष्काळी परिस्थितीमुळे पाण्याचे महत्त्व लक्षात घेऊन सार्वजनिक गणेश मंडळांनी मोठ्या मूर्तींच्या विसर्जनाची व्यवस्था स्वतःच्या स्तरावर करावी आणि नागरिकांनी कृत्रिम तलाव व संकलन केंद्रांचा वापर करावा. पर्यावरणपूरक गणेशोत्सव आणि पाणी बचतीसाठी धाराशिवकरांनी नगरपरिषद प्रशासनाला सहकार्य करावे, असे आवाहन मुख्याधिकारी नीता अंधारे यांनी केले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
