आषाढी यात्रेत एसटी कर्मचाऱ्यांसाठी स्वखर्चातून तीन दिवस भोजन सेवाभावाचा आदर्श – परिवहनमंत्री प्रताप सरनाईक

आषाढी यात्रेत एसटी कर्मचाऱ्यांसाठी स्वखर्चातून तीन दिवस मोफत भोजन सेवाभावाचा आदर्श – परिवहनमंत्री प्रताप सरनाईक

आषाढी यात्रेत एसटी कर्मचाऱ्यांसाठी तीन दिवस मोफत चहा, नाश्ता व भोजनाची व्यवस्था सेवाभावाचा अनोखा आदर्श – परिवहनमंत्री प्रताप सरनाईक

मुंबई / पंढरपूर लोकविचार 

आषाढी यात्रेनिमित्त लाखो वारकऱ्यांना सुरक्षित व वेळेवर सेवा देण्यासाठी दिवस-रात्र कर्तव्य बजावणाऱ्या महाराष्ट्र राज्य मार्ग परिवहन महामंडळाच्या (एसटी) अधिकारी, कर्मचारी, चालक, वाहक, यांत्रिकीकरण विभागातील कर्मचारी तसेच इतर मदतनीस यांच्यासाठी राज्याचे परिवहनमंत्री प्रताप सरनाईक यांनी स्वखर्चातून तीन दिवस मोफत चहा, नाश्ता व भोजनाची व्यवस्था केली आहे. २४, २५ आणि २६ जुलै या सलग तीन दिवस हा उपक्रम राबविण्यात येत असून, कर्मचाऱ्यांप्रती असलेली आपुलकी आणि सामाजिक बांधिलकी जपत पांडुरंगाची सेवा करण्याची संधी मिळाल्याचे समाधान त्यांनी व्यक्त केले.

आषाढी यात्रेदरम्यान एसटी महामंडळावर मोठा ताण येत असतो. लाखो भाविकांना त्यांच्या इच्छित स्थळी सुरक्षित पोहोचविण्यासाठी एसटीचे अधिकारी व कर्मचारी रात्रंदिवस सेवा बजावत असतात. अशा परिस्थितीत त्यांच्या आरोग्याची, सोयी-सुविधांची आणि मनोबलाची काळजी घेणे हीदेखील तितकीच महत्त्वाची जबाबदारी असल्याचे प्रताप सरनाईक यांनी नमूद केले.

“एसटी हे केवळ महामंडळ नसून एक कुटुंब आहे. लाखो प्रवाशांची सेवा करणाऱ्या आपल्या कर्मचाऱ्यांची काळजी घेणे हे आपले कर्तव्य आहे. म्हणूनच त्यांच्यासाठी स्वखर्चातून भोजनाची व्यवस्था करण्यात आली आहे,” असे त्यांनी सांगितले.

ते पुढे म्हणाले की, शासनाच्या प्रशासकीय निर्णयांपुरते मर्यादित न राहता कर्मचाऱ्यांच्या सुख-दुःखात सहभागी होण्याची परंपरा जपणेही तितकेच महत्त्वाचे आहे. “मी केवळ परिवहनमंत्री म्हणून नव्हे, तर एसटी कुटुंबातील एक सदस्य म्हणून ही प्रेमाची भेट कर्मचाऱ्यांना अर्पण करत आहे,” असेही त्यांनी आवर्जून स्पष्ट केले.

या उपक्रमामुळे एसटी कर्मचाऱ्यांमध्ये समाधानाचे वातावरण निर्माण झाले असून, सेवाभाव, संवेदनशीलता आणि कर्मचारी कल्याणाचा आदर्श समाजासमोर उभा राहील, असा विश्वासही प्रताप सरनाईक यांनी व्यक्त केला. आषाढी यात्रेसारख्या महत्त्वाच्या धार्मिक सोहळ्यात कर्मचाऱ्यांच्या पाठीशी उभे राहत त्यांना दिलासा देण्याचा हा उपक्रम एसटी कुटुंबासाठी प्रेरणादायी ठरत असल्याची भावना अनेक कर्मचाऱ्यांनी व्यक्त केली.

लोकविचार सत्य शोधून लिहिण्याची ताकद संपादक अमजद सय्यद 8390088786