जनता महाविद्यालयात ‘नशामुक्ती’चा जागर; ७०० विद्यार्थ्यांना अंमली पदार्थांच्या दुष्परिणामांची माहिती
धाराशिव Lokvichar – लोकविचार
छत्रपती संभाजीनगर कृती विभागाच्या वतीने अंमली पदार्थविरोधी जनजागृती अभियानांतर्गत येडशी (ता. धाराशिव) येथील जनता महाविद्यालयात शनिवारी (दि. ४ जुलै) नशामुक्ती जनजागृती कार्यक्रम उत्साहात पार पडला. या कार्यक्रमात सुमारे ७०० शालेय व महाविद्यालयीन विद्यार्थी, ४ प्राध्यापक आणि २० शिक्षक सहभागी झाले.
सध्याच्या काळात युवा पिढीमध्ये वाढत चाललेल्या अंमली पदार्थांच्या व्यसनाधीनतेच्या पार्श्वभूमीवर विद्यार्थ्यांना गांजा, अफू, ड्रग्ज तसेच विविध प्रकारच्या अमली गोळ्यांचे सेवन केल्यामुळे होणारे शारीरिक, मानसिक आणि सामाजिक दुष्परिणाम याविषयी सविस्तर मार्गदर्शन करण्यात आले. विद्यार्थ्यांना कोणत्याही प्रकारच्या नशेपासून दूर राहण्याचे आवाहन करण्यात आले तसेच सर्व उपस्थितांना नशामुक्तीची शपथ देण्यात आली.
हा जनजागृती कार्यक्रम उपविभागीय पोलीस अधिकारी (DySP) साईनाथ ठोंबरे, पोलीस निरीक्षक सचिन काळे, पोलीस निरीक्षक गीता बागवडे आणि सहाय्यक पोलीस निरीक्षक दिपाली पाटील यांच्या मार्गदर्शनाखाली आयोजित करण्यात आला.
कार्यक्रमाचे मार्गदर्शन पोलीस उपनिरीक्षक प्रदीप ठाकूर, सहाय्यक पोलीस उपनिरीक्षक वाहेद मुल्ला, हनुमान पुरके, पोलीस हेडकॉन्स्टेबल शैला टेळे, सुरेश राऊत आणि नागेश केंद्रे यांनी केले.
कार्यक्रमाद्वारे विद्यार्थ्यांमध्ये अंमली पदार्थांविषयी जागरूकता निर्माण करून व्यसनमुक्त, निरोगी आणि सुदृढ समाज घडविण्याचा संदेश देण्यात आला. उपस्थित विद्यार्थी, प्राध्यापक आणि शिक्षकांनीही या उपक्रमाला उत्स्फूर्त प्रतिसाद दिला.
लोकविचार सत्य शोधून लिहिण्याची ताकद संपादक अमजद सय्यद 083900 88786
