किराणा दुकान फोडणारे तीन सराईत आरोपी लाखोंच्या मुद्देमालासह जेरबंद; स्थानिक गुन्हे शाखेची धडाकेबाज कारवाई
धाराशिव लोकविचार
रूई (ढोकी) येथील किराणा दुकान फोडून लाखो रुपयांचा ऐवज लंपास करणाऱ्या तीन सराईत आरोपींना स्थानिक गुन्हे शाखेच्या पथकाने अटक करत दोन घरफोडीच्या गुन्ह्यांचा उलगडा केला आहे. आरोपींकडून चोरीतील मुद्देमालासह गुन्ह्यात वापरण्यात आलेली इनोव्हा कार असा एकूण ६ लाख ५९ हजार ६१५ रुपयांचा मुद्देमाल जप्त करण्यात आला आहे.
स्थानिक गुन्हे शाखेचे पथक ३ जुलै रोजी मालमत्तेविषयक गुन्ह्यांचा तपास करत असताना त्यांना गुप्त माहिती मिळाली. त्यानुसार कन्हेरवाडी पाटी येथील सुभाष भीमराव काळे यांनी काही दिवसांपूर्वी किराणा दुकानातून चोरी केलेले तेलाचे डबे व इतर साहित्य शेतातील पत्र्याच्या शेडमध्ये लपवून ठेवले असल्याची माहिती मिळाली. तसेच आरोपी पुन्हा इनोव्हा कार घेऊन त्या ठिकाणी येणार असल्याचेही समजले.
या माहितीच्या आधारे पोलिसांनी सापळा रचून सुभाष भीमराव काळे (वय ३४, रा. कन्हेरवाडी पाटी), अनिल रमेश शिंदे (वय २९, रा. मुरुमसा) आणि अरुण बबन शिंदे (वय २८, रा. माहा) यांना ताब्यात घेतले. सुरुवातीला आरोपींनी उडवाउडवीची उत्तरे दिली. मात्र कसून चौकशी केल्यानंतर त्यांनी चोरीची कबुली दिली.
आरोपींच्या सांगण्यावरून पोलिसांनी शेतातील पत्र्याच्या शेडमधून किर्ती गोल्ड व इतर कंपन्यांचे तेलाचे १३ डबे, निळ्या व लाल रंगाच्या ८ पिशव्यांमध्ये असलेले घडी डिटर्जंट व स्मार्ट निर्मा पावडर तसेच गुन्ह्यात वापरलेली इनोव्हा कार जप्त केली. या कारवाईत एकूण ६,५९,६१५ रुपयांचा मुद्देमाल हस्तगत करण्यात आला असून दोन गुन्ह्यांचा उलगडा झाला आहे.
ही कारवाई पोलीस अधीक्षक रितू खोखर व अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार यांच्या नेतृत्वाखाली सपोनि सचिन खटके, सपोनि स्वप्नील वाळके, पोहेकॉ विनोद जानराव, नितीन जाधवर, अमोल निंबाळकर, बबन जाधवर, मनोज जगताप, मपोहेकॉ शोभा बांगर, चापो, महेबूब अरब, रोहित दंडनाईक आदींच्या पथकाने यशस्वीरीत्या पार पाडली.
लोकविचार सत्य शोधून लिहिण्याची ताकद संपादक अमजद सय्यद 8390088786
