कब्रस्तान स्वच्छतेचा प्रश्न सभागृहात ए आय एम आय एम पक्षाचे नगरसेवक अझहर मुजावर यांचा पुढाकार
नगरपालिकेच्या कर्मचाऱ्यांमार्फत कायमस्वरूपी स्वच्छता करण्याची सर्वसाधारण सभेत मागणी
धाराशिव | लोकमदत न्यूज
धाराशिव नगरपालिकेची सर्वसाधारण सभा विविध मुद्द्यांमुळे गाजली. या सभेत एआयएमआयएम पक्षाचे एकमेव नगरसेवक अझहर चांद मुजावर यांनी शहरातील कब्रस्तानातील स्वच्छतेचा प्रश्न ऐनवेळच्या विषयात मांडत सभागृहाचे लक्ष वेधले.
धाराशिव शहरातील कब्रस्तान परिसरात दर शुक्रवारी तसेच रमजान ईद, बकरीद ईद आणि इतर धार्मिक प्रसंगी मोठ्या प्रमाणावर नागरिक येत असतात. तसेच दफनविधीसाठीही या ठिकाणी सतत नागरिकांची वर्दळ असते. मात्र, कब्रस्तान परिसरात मोठ्या प्रमाणावर वाढलेले झाडझुडपे, गवत आणि अस्वच्छता यामुळे नागरिकांना अनेक अडचणींचा सामना करावा लागत असल्याची बाब मुजावर यांनी सभागृहाच्या निदर्शनास आणून दिली.
स्मशानभूमीत ज्या पद्धतीने नगरपालिकेचे कर्मचारी साफसफाई करतात, त्याच धर्तीवर कब्रस्तान परिसरातही झाडे-झुडपे तोडणे, गवत काढणे आणि स्वच्छता राखण्यासाठी नगरपालिकेच्या कर्मचाऱ्यांची कायमस्वरूपी नेमणूक करण्यात यावी, अशी मागणी त्यांनी केली. सामाजिक बांधिलकी जपत मुजावर यांनी हा विषय सभागृहात मांडल्याने या मुद्द्याची गंभीर दखल घेण्याची वेळ प्रशासनावर आली.
या मागणीमुळे धाराशिव येथील कब्रस्तान परिसरात नियमित स्वच्छता व्यवस्था सुरू होण्याची शक्यता व्यक्त होत आहे. शहरातील विविध स्तरातून नगरसेवक अझहर मुजावर यांच्या या पुढाकाराचे स्वागत करण्यात येत असून त्यांच्या कार्याचे नागरिकांकडून कौतुक केले जात आहे.
लोकमदत न्यूज – सत्य शोधून लिहिण्याची ताकद
संपादक : अमजद सय्यद
मो. ८३९००८८७८६
