प्रथमेश देशमुखच्या कुटुंबीयांचे काँग्रेसकडून सांत्वन; पालनपोषणाची जबाबदारी स्वीकारणार
धाराशिव लोकविचार
प्रतिनिधीपरंडा तालुक्यातील खासापुरी येथील एमपीएससी परीक्षेची तयारी करणाऱ्या प्रथमेश देशमुख यांनी पुणे येथे आत्महत्या केल्याची घटना बुधवारी (दि. ९) घडली. अधिकारी होण्याचे स्वप्न उराशी बाळगून मेहनत करणाऱ्या प्रथमेश यांच्या निधनाने त्यांच्या कुटुंबावर मोठे संकट कोसळले आहे.काँग्रेसचे जिल्हाध्यक्ष उमेश राजेनिंबाळकर यांनी गुरुवारी (दि. १०) खासापुरी येथे प्रथमेश यांच्या निवासस्थानी भेट देऊन कुटुंबीयांचे सांत्वन केले.
या दुःखाच्या काळात कुटुंबाला एकटे पडू दिले जाणार नसून, प्रथमेश यांच्या कुटुंबाच्या पुढील पालनपोषणाची जबाबदारी धाराशिव जिल्हा काँग्रेस स्वीकारणार असल्याची ग्वाही राजेनिंबाळकर यांनी दिली.गेल्या वर्षी अतिवृष्टीमुळे कुटुंबाच्या शेतीचे मोठे नुकसान झाले होते. यंदाही पावसाअभावी दुष्काळी परिस्थिती निर्माण होऊन सोयाबीनसह उभी पिके करपली आहेत. त्यात एमपीएससी परीक्षेतील अत्यंत कमी फरकाने आलेले अपयश तसेच पेपरफुटी व परीक्षेतील गैरप्रकारांबाबत निर्माण झालेली अस्वस्थता, अशा प्रतिकूल परिस्थितीचा प्रथमेश यांच्या मानसिकतेवर परिणाम झाल्याची भावना यावेळी व्यक्त करण्यात आली.प्रथमेश यांच्या निधनाने एका होतकरू तरुणाचे अधिकारी होण्याचे स्वप्न अधुरे राहिले असून, त्यांच्या कुटुंबाच्या सुख-दुःखात काँग्रेस ठामपणे पाठीशी राहील, असे राजेनिंबाळकर यांनी सांगितले.
पारदर्शक, निष्पक्ष परीक्षा व्यवस्था हवी : राजेनिंबाळकरशेतकरी आणि विद्यार्थ्यांना भक्कम आधार देणे ही सरकारची जबाबदारी आहे. विद्यार्थ्यांना पारदर्शक, विश्वासार्ह आणि निष्पक्ष परीक्षा व्यवस्था मिळणे आवश्यक आहे. प्रथमेशसारख्या होतकरू तरुणांची स्वप्ने प्रतिकूल परिस्थितीची बळी ठरू नयेत, यासाठी सरकारने संवेदनशीलतेने आणि गांभीर्याने पावले उचलावीत, अशी मागणी उमेश राजेनिंबाळकर यांनी केली.
लोकविचार सत्य शोधून लिहिण्याची ताकद संपादक अमजद सय्यद 8390088786
