एनसीएमसी कार्डची प्रक्रिया सुरू; तांत्रिक अडचणी दूर करून ग्रामीण प्रवाशांना दिलासा देण्याची गरज
धाराशिव | लोकविचार
धाराशिव बसस्थानकात एसटी महामंडळाच्या एनसीएमसी कार्डची प्रक्रिया सुरू असून, ग्रामीण भागातून एसटीने प्रवास करणाऱ्या नागरिकांना या सुविधेचा लाभ मिळत आहे.
एनसीएमसी कार्ड काढण्याची सुविधा बसस्थानक परिसरातील निश्चित केंद्रावरच उपलब्ध असून त्यामुळे ग्रामीण भागातील येणाऱ्या नागरिकांची यामुळे गैरसोय दूर होत आहे.एनसीएमसी कार्डमुळे एसटी प्रवाशांना डिजिटल पद्धतीने प्रवासाचे व्यवहार करता येत असून, नागरिकांसाठी ही सुविधा उपयुक्त ठरत आहे.
यापूर्वी कार्ड काढण्याच्या प्रक्रियेत येणाऱ्या अडचणी व विलंबामुळे प्रवाशांना त्रास सहन करावा लागत होता. मात्र, सध्या कार्ड काढण्याची प्रक्रिया पुन्हा सुरू असून नागरिकांना त्याचा लाभ मिळत आहे.दरम्यान, कार्ड काढण्यासाठी आवश्यक असलेले सर्व्हर कधी-कधी एक-दोन दिवस बंद राहत असल्याने त्या काळात नागरिकांना अडचणींचा सामना करावा लागतो.
विशेषतः ग्रामीण भागातून धाराशिव शहरात केवळ एनसीएमसी कार्ड काढण्यासाठी येणाऱ्या नागरिकांचा वेळ व प्रवासाचा खर्च वाया जाण्याची शक्यता असते.त्यामुळे एनसीएमसी कार्डची सुविधा बंद करण्याऐवजी ती नियमित, सुरळीत आणि तांत्रिक अडथळ्यांविना सुरू राहण्यासाठी कंपनी बरोबरच एसटी प्रशासनाने आवश्यक उपाययोजना करणे गरजेचे आहे.
सर्व्हरची समस्या वारंवार उद्भवू नये तसेच तांत्रिक बिघाड झाल्यास पर्यायी व्यवस्था उपलब्ध करून देण्यात यावी, अशी अपेक्षा प्रवाशांकडून व्यक्त होत आहे.
पूर्वीच्या काळात कार्ड काढण्याच्या प्रक्रियेत होणारा विलंब व नागरिकांच्या तक्रारी आता मागे पडत असून, सध्या सुरू असलेली एनसीएमसी कार्ड सुविधा प्रवाशांसाठी उपयुक्त ठरत आहे. ही सुविधा अधिक सक्षम करून ग्रामीण भागातील नागरिकांना त्याचा नियमित लाभ मिळावा, यासाठी प्रशासनाने सकारात्मक पावले उचलण्याची गरज आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
