गरिबीवर मात करत सारोळ्याचा गणेश वडलीक पुणे पोलीस दलात भरती… मातंग समाजाकडून भव्य सत्कार
धाराशिव | लोकमदत न्यूज
धाराशिव तालुक्यातील सारोळा बुद्रुक येथील गणेश नेताजी वडलीक यांची पुणे पोलीस दलात निवड झाल्याबद्दल मातंग समाजाच्या वतीने त्यांचा मोठ्या उत्साहात सत्कार करण्यात आला.डॉ. बाबासाहेब आंबेडकर चौक येथे हा कार्यक्रम पार पडला.
यावेळी नगर परिषद पाणीपुरवठा सभापती विलास बापू लोंढे, मिलिंद आप्पा पेठे तसेच समाजातील कार्यकर्त्यांच्या उपस्थितीत धाराशिव शहरातील डॉ. बाबासाहेब आंबेडकर यांच्या पुतळ्याला अभिवादन करून गणेश वडलीक यांचा सत्कार करण्यात आला.
गणेश वडलीक हे अत्यंत साध्या कुटुंबातून पुढे आले असून त्यांचे आई-वडील लागल ते काम तसेच दुसऱ्याच्या शेतात मोलमजुरी करून संसार चालवतात. अशा प्रतिकूल परिस्थितीतही त्यांनी जिद्द, मेहनत आणि चिकाटीच्या जोरावर पोलीस भरतीत यश संपादन केले आहे. त्यांच्या या यशामुळे मातंग समाजातून त्यांचे सर्वत्र कौतुक होत आहे.
कार्यक्रमादरम्यान मार्गदर्शन करताना नगर परिषद पाणी पुरवठा सभापती विलास (बापू) लोंढे यांनी युवकांना शिक्षणाचे महत्त्व पटवून दिले. “मातंग समाजातील युवकांनी शिक्षणाकडे अधिक लक्ष देऊन स्पर्धा परीक्षा व विविध क्षेत्रांमध्ये पुढे यावे. शिक्षणामुळेच यश मिळते,” असे आवाहन त्यांनी केले.
यावेळी उपस्थित मान्यवरांनी गणेश वडलीक यांना पुढील वाटचालीसाठी शुभेच्छा देत त्यांच्या यशाचा गौरव केला.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
