शेतकरी कुटुंबाला आ.सावंतांचा मदतीचा हात; दोन लाखांची तातडीची मदत, दोन्ही मुलांच्या शिक्षणाची घेतली जबाबदारी!
भूम तालुक्यातील आत्महत्याग्रस्त जाधवर कुटुंबाला दिला आधार; संकटाच्या काळात धीर न सोडण्याचे आमदार प्रा. डॉ. तानाजीराव सावंत यांचे आवाहन
धाराशिव | लोकविचार
धाराशिव जिल्ह्यातील भूम तालुक्यातील जयवंत नगर येथील तरुण शेतकरी योगेश दिनकर जाधवर (वय ३०) यांनी नैराश्यातून गळफास घेऊन आत्महत्या केल्याची दुर्दैवी घटना घडली आहे. या घटनेमुळे जाधवर कुटुंबावर दुःखाचा डोंगर कोसळला असून, पत्नी, आठ वर्षांचा मुलगा, चार वर्षांची मुलगी आणि वृद्ध आई-वडील असा परिवार उघड्यावर पडला आहे. या कठीण प्रसंगी भूम-परंडा-वाशी मतदारसंघाचे आमदार प्रा. डॉ. तानाजीराव सावंत यांनी जाधवर कुटुंबाला तातडीने दोन लाख रुपयांची आर्थिक मदत देत आधार दिला. तसेच कुटुंबातील दोन्ही चिमुकल्यांच्या संपूर्ण शिक्षणाची जबाबदारी स्वीकारून त्यांच्या पालकत्वाची घोषणा केली.
तरुण शेतकऱ्याच्या निधनाची माहिती मिळताच आमदार प्रा. डॉ. तानाजीराव सावंत यांनी तत्काळ स्थानिक पदाधिकाऱ्यांना पीडित कुटुंबाच्या सांत्वनासाठी पाठवले. यावेळी कुटुंबाला दोन लाख रुपयांचा धनादेश सुपूर्द करण्यात आला. कुटुंबातील कर्त्या व्यक्तीच्या निधनामुळे निर्माण झालेल्या संकटात आर्थिक मदतीसोबतच मुलांच्या भवितव्याची जबाबदारी स्वीकारण्याचा निर्णय घेतल्याने या कुटुंबाला मोठा दिलासा मिळाला आहे.
दुष्काळाच्या संकटात धीर सोडू नका; आत्महत्येसारखे टोकाचे पाऊल उचलू नका!
या घटनेच्या पार्श्वभूमीवर आमदार प्रा. डॉ. तानाजीराव सावंत यांनी जनतेला भावनिक आणि संवेदनशील आवाहन केले. आपल्या भागात दुष्काळाचे संकट कितीही गंभीर असले, तरी शेतकरी बांधवांनी आणि सर्वसामान्य नागरिकांनी धीर सोडू नये. या कठीण परिस्थितीत आपण सर्वांनी एकमेकांच्या पाठीशी उभे राहून संकटाचा सामना केला पाहिजे. कोणत्याही परिस्थितीत आत्महत्येसारखे टोकाचे पाऊल उचलू नये, असे आवाहन त्यांनी केले.
शेतकरी कुटुंबावर दुःखाचा डोंगर कोसळलेला असताना तातडीची आर्थिक मदत आणि दोन्ही मुलांच्या शिक्षणाची जबाबदारी स्वीकारण्याच्या निर्णयातून सावंत यांनी सामाजिक बांधिलकी जपण्याचा प्रयत्न केला आहे. विशेषतः वडिलांचे छत्र हरपलेल्या दोन लहान मुलांच्या शिक्षणाची जबाबदारी स्वीकारल्यामुळे त्यांच्या भविष्यासाठी आधार निर्माण झाला आहे.
यावेळी युवासेनेचे माजी जिल्हाप्रमुख डॉ. चेतन बोराडे, विशाल ढगे, बालाजी गुंजाळ, सुनील भोईटे, रामकिसन गव्हाणे, युवराज हुंबे, अजित पवार, प्रशांत काका मुंडेकर, गजेंद्रजी खुणे, सागर गटकळ, विजय जाधव, नारायण मोराळे, अंगद नागरगोजे, नामदेव नागरगोजे, गोरख नागरगोजे, मोहन नागरगोजे यांच्यासह मतदारसंघातील प्रमुख पदाधिकारी, स्थानिक लोकप्रतिनिधी, ग्रामस्थ, शेतकरी बांधव आणि पत्रकार उपस्थित होते.
लोकविचार सत्य शोधून लिहिण्याची ताकद संपादक अमजद सय्यद 8390088786
