विधान परिषद निवडणुकीच्या तोंडावर तुतारीच्या नगरसेवकांची भाजप आमदारांच्या निवासस्थानी भेट! महाविकास आघाडीत खळबळशहर
विकासासाठी चर्चा की राजकीय समीकरणांची जुळवाजुळव? भेटीमागील नेमके कारण गुलदस्त्यात!
धाराशिव लोकविचार
धाराशिव-लातूर-बीड विधान परिषद निवडणुकीची रणधुमाळी सुरू असतानाच धाराशिवच्या राजकीय वर्तुळात एका भेटीची जोरदार चर्चा रंगू लागली आहे. राष्ट्रवादी काँग्रेस (शरदचंद्र पवार) पक्षाशी संबंधित काही नगरसेवकांनी भाजपचे आमदार राणाजगजितसिंह पाटील यांच्या निवासस्थानी सदिच्छा भेट घेतल्याची माहिती विश्वसनीय सूत्रांकडून मिळत आहे.विशेष म्हणजे भाजपचे प्रदेश सरचिटणीस तथा माजी आमदार सुनील राणे हे जिल्हा दौऱ्यावर असताना ही भेट झाल्याचे सांगितले जात आहे.
त्यामुळे या भेटीचे राजकीय अर्थ लावले जाऊ लागले असून महाविकास आघाडीतील घटक पक्षांमध्ये सर्व काही आलबेल आहे का, असा प्रश्न उपस्थित केला जात आहे.विश्वसनीय सूत्रांच्या माहितीनुसार, संबंधित नगरसेवकांनी आमदारांच्या निवासस्थानी भेट घेतल्याची चर्चा सकाळपासून शहरात खमंग सुरू आहे. मात्र या भेटीमागील नेमके कारण अद्याप अधिकृतरीत्या समोर आलेले नाही.तर काही नगरसेवकांनी या भेटीला दुजोरा दिला असून विकासाच्या दृष्टिकोनातून भेट घेतली असल्याचे सांगितले.
शहर विकासाच्या विविध प्रश्नांवर चर्चा करण्यासाठी ही भेट झाली होती की आगामी विधान परिषद निवडणुकीच्या पार्श्वभूमीवर काही राजकीय घडामोडींचा भाग होती, याबाबत तर्क-वितर्क लावले जात आहेत.राजकीय जाणकारांच्या मते, विधान परिषद निवडणुकीच्या पार्श्वभूमीवर स्थानिक स्वराज्य संस्थांमधील लोकप्रतिनिधींची भूमिका महत्त्वाची मानली जाते. अशा परिस्थितीत विरोधी राजकीय विचारसरणीच्या नेत्यांमधील भेटींकडे विशेष लक्ष वेधले जाणे स्वाभाविक आहे.
दरम्यान, आमदार राणाजगजितसिंह पाटील किंवा संबंधित नगरसेवक यांच्या कार्यालयाकडून या भेटीबाबत कोणतीही अधिकृत प्रतिक्रिया देण्यात आलेली नाही. त्यामुळे ही भेट केवळ सदिच्छा भेट म्हणून पाहावी की त्यामागे काही वेगळी राजकीय गणिते आहेत, याबाबतचे गूढ कायम आहे.
मात्र या घडामोडीमुळे धाराशिवच्या राजकीय वर्तुळात खळबळ उडाली असून, ऐन विधान परिषद निवडणुकीच्या तोंडावर महाविकास आघाडीमध्ये उभी फूट पडून काही नवीन राजकीय समीकरणे आकार घेत आहेत का, याकडे सर्वांचे लक्ष लागले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
