लोकमदत न्यूजचा दणका! न.प. हद्दीतील निर्जन भागातील बोगस पाईपलाईन उखडण्यास सुरुवात सत्ताधाऱ्यांचे ठेकेदाराला खडे बोल
धाराशिव | लोकमदत न्यूज
धाराशिव शहरातील पाणीपुरवठा घोटाळ्याचा पर्दाफाश करत लोकमदत न्यूजने 27 मार्च 2026 रोजी प्रसिद्ध केलेल्या वृत्ताची दखल घेत नगरपरिषद प्रशासनाने तात्काळ कारवाई सुरू केली आहे. निर्जन भागात टाकण्यात आलेली लाखो रुपयांची पाईपलाईन आता काढून घेण्याचे काम प्रत्यक्षात सुरू झाले असून, संबंधित ठेकेदारावर कारवाईची तलवार लटकली आहे.
शहरात नागरिक पाण्यासाठी त्रस्त असताना जाधववाडी रोड परिसरातील निर्जन ठिकाणी पाईपलाईन टाकण्याचा प्रकार उघडकीस आणल्यानंतर नगराध्यक्ष नेहा काकडे, गटनेते अमित शिंदे आणि पाणीपुरवठा सभापती विलास लोंढे यांनी पाणीपुरवठा अभियंता यांना तात्काळ संबंधित ठिकाणांची पाहणी करण्याचे आदेश दिले होते. “ज्या ठिकाणी लोकवस्ती नाही, तेथे पाईपलाईन टाकण्याची आवश्यकता नाही; अशा ठिकाणची लाईन तात्काळ काढून घ्या आणि जिथे प्रत्यक्ष गरज आहे तिथेच प्राधान्याने काम करा,” असे सक्त निर्देश देण्यात आले होते.
या आदेशांची अंमलबजावणी करत पाणीपुरवठा अभियंता संग्राम भापकर यांनी संबंधित ठिकाणी भेट देत ठेकेदाराला चांगलेच खडे बोल सुनावले. “लोकवस्ती नसताना इतक्या आतपर्यंत पाईपलाईन टाकण्यामागचा उद्देश काय?” असा जाब विचारत त्यांनी तत्काळ पाईपलाईन काढण्याचे आदेश दिले. त्यानुसार ठेकेदाराने संबंधित पाईपलाईन उखडण्याचे काम सुरू केले आहे, मात्र हे पाईपलाईन करण्याचे काम फक्त फोटो पूर्ण काढून घेण्यात यावी अन्यथा परत एकदा ठेकेदाराकडून सत्ताधाऱ्यांची दिशाभूल तर करून पाईपलाईन जसे राहणार तर नाही ना असा देखील आता प्रश्न नागरिक उपस्थित करीत आहेत
दरम्यान, या संपूर्ण प्रकरणात आर्थिक देवाणघेवाण व संगनमताचा संशय अधिक गडद झाला असून, लोकमदत न्यूजच्या बातमीमुळे या प्रकरणाला मोठी गती मिळाल्याचे स्पष्ट झाले आहे. नागरिकांमध्येही या कारवाईचे स्वागत होत असून, “ज्या ठिकाणी प्रत्यक्ष गरज आहे तिथेच काम व्हावे,” अशी मागणी पुन्हा जोर धरत आहे.
तसेच, संबंधित ठेकेदाराने यापूर्वीही अशाच प्रकारे इतर ठिकाणी बोगस पाईपलाईन टाकली का? कोणाच्या आदेशाने ही कामे झाली? याची सखोल चौकशी करावी, अशी मागणी नागरिकांकडून होत आहे.
दरम्यान, नगरपरिषद प्रशासनाने या प्रकरणाची चौकशी सुरू केल्याचे संकेत असून, दोषींवर कठोर कारवाई होण्याची शक्यता व्यक्त केली जात आहे. शहरातील पाणीप्रश्नाच्या पार्श्वभूमीवर ही कारवाई महत्त्वाची मानली जात असून, लोकमदत न्यूजने उचललेल्या आवाजाला अखेर न्याय मिळाल्याची भावना नागरिकांमध्ये व्यक्त होत आहे.
लोकमदत न्यूज
“सत्य शोधून लिहिण्याची ताकद”
संपादक : अमजद सय्यद 8390088786
