कळंब ड्रग्ज प्रकरण : पेडलरच अटकेत, खरे ग्राहक कुठे?; पोलिस तपासावर प्रश्नचिन्ह!
सहा आरोपी अटकेत, मात्र ड्रग्ज खरेदी करणाऱ्यांपर्यंत तपास पोहोचला का? नागरिकांमध्ये चर्चांना उधाण
कळंब लोकविचार
कळंब येथील गाजलेल्या एमडी ड्रग्ज प्रकरणात पोलिसांनी आतापर्यंत नगरसेवक मोसीन सलीम मिर्झा याच्यासह इतर सहा आरोपींना अटक केली आहे. मात्र या कारवाईनंतर आता पोलिस तपासाच्या दिशेबाबत प्रश्न उपस्थित होऊ लागले आहेत.
पोलिस तपासात अटक करण्यात आलेले सर्व आरोपी हे ड्रग्ज पुरवठा करणारे अर्थात ‘पेंडलर’ असल्याचे समोर आले आहे. गेल्या पंधरा दिवसांपूर्वी कळंब शहरात ड्रग्ज रॅकेटचा पर्दाफाश झाला. त्यानंतर एकामागोमाग एक कारवाया करत पोलिसांनी सहा आरोपींना अटक केली. मात्र या संपूर्ण प्रकरणात ड्रग्ज विक्री करणाऱ्यांवर कारवाई झाली असली तरी हा माल नेमका कोणाला विकला जात होता, कोण त्याची खरेदी करत होते आणि या जाळ्याचे ग्राहक कोण आहेत, याबाबत अद्याप कोणतीही मोठी कारवाई समोर आलेली नाही.
ड्रग्ज तस्करी आणि विक्रीचे जाळे ग्राहकांशिवाय उभे राहू शकत नाही. त्यामुळे केवळ पुरवठादारांवर कारवाई करून तपास पूर्ण होऊ शकत नसल्याचे मत नागरिक व्यक्त करत आहेत. ड्रग्ज सेवन करणारे आणि खरेदी करणारे आरोपी अद्याप पोलिसांच्या जाळ्यात का आले नाहीत, असा सवालही उपस्थित केला जात आहे.
नगरसेवक मोसीन मिर्झा याला अटक करून २४ ऑगस्टपर्यंत पोलीस कोठडी सुनावण्यात आली असली तरी या प्रकरणातील आर्थिक व्यवहार, ग्राहक साखळी आणि स्थानिक पातळीवरील नेटवर्कचा संपूर्ण उलगडा होणे आवश्यक असल्याची मागणी होत आहे.
कळंब ड्रग्ज प्रकरणाचा तपास सध्या सुरू असला तरी आतापर्यंतची कारवाई केवळ पेंडलरपुरतीच मर्यादित राहिल्याने तपासाच्या परिणामकारकतेवर प्रश्नचिन्ह निर्माण झाले आहे. आता पोलिस तपास ड्रग्ज खरेदी करणारे आणि सेवन करणाऱ्यांपर्यंत पोहोचतो का, याकडे संपूर्ण जिल्ह्याचे लक्ष लागले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
