कॉपर वायर चोरी प्रकरण उघडकीस 3.70 लाखांच्या मुद्देमालासह मुख्य आरोपी ताब्यात स्थानिक गुन्हे शाखेची दमदार कारवाई
धाराशिव | लोकविचार
शहर व ग्रामीण भागात वाढत्या चोरीच्या घटनांना आळा घालण्यासाठी सक्रिय असलेल्या स्थानिक गुन्हे शाखेने आणखी एक महत्त्वाची कामगिरी बजावत दुकानातील कॉपर वायर चोरी प्रकरण उघडकीस आणले आहे. या कारवाईत मुख्य आरोपीला ताब्यात घेऊन सुमारे ₹3 लाख 70 हजारांचा मुद्देमाल जप्त करण्यात आला आहे.
दि. 23 एप्रिल 2026 रोजी स्थानिक गुन्हे शाखेचे सहाय्यक पोलीस निरीक्षक अमोल मोरे व त्यांच्या पथकाने मालमत्तेविषयक गुन्ह्यांचा तपास सुरू असताना पेट्रोलिंगदरम्यान गोपनीय माहितीच्या आधारे ही कारवाई केली. मिळालेल्या माहितीनुसार, शिराढोण पोलीस ठाण्यात नोंद असलेल्या गुन्ह्यातील आरोपी धनाजी बाबुराव पवार (रा. आळणी फाटा, ता. जि. धाराशिव) हा चोरीचा माल विक्रीसाठी वाशी फाटा येथे थांबलेला असल्याची खात्रीलायक माहिती मिळाली.
या माहितीच्या आधारे पथकाने तत्काळ सापळा रचून धनाजी पवार यास ताब्यात घेतले. चौकशीदरम्यान आरोपीने साथीदार शिवाजी सर्जेराव काळे (रा. अंदोरा, ता. कळंब) याच्यासह शिराढोण येथील दुकानातून 200 ते 250 किलो कॉपर वायर चोरी केल्याची कबुली दिली. ही चोरी टाटा सुमो (क्रमांक MH 14 CX 2377) वाहनाच्या साहाय्याने करण्यात आल्याचेही स्पष्ट झाले.
पोलीसांनी आरोपीकडून 17 किलो कॉपर वायर व संबंधित टाटा सुमो वाहन असा एकूण ₹3,70,400 किंमतीचा मुद्देमाल जप्त केला आहे. उर्वरित चोरीच्या मालाचा शोध सुरू असून फरार आरोपीचा शोध घेतला जात आहे.
ही कारवाई पोलीस अधीक्षक श्रीमती रितू खोखर व अपर पोलीस अधीक्षक श्रीमती शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार यांच्या नेतृत्वात पार पडली. या पथकात सपोनि अमोल मोरे, सचिन खटके, पोह अमोल चव्हाण, बळीराम शिंदे, अमोल निंबाळकर, राहुल नाईकवाडी, महिला पोलीस शोभा बांगर तसेच चालक विनायक दहिहंडे यांचा समावेश होता.
या यशस्वी कारवाईमुळे स्थानिक गुन्हे शाखेचे सर्वत्र कौतुक होत असून चोरीच्या घटनांवर अंकुश ठेवण्यास मदत होणार असल्याची भावना नागरिकांमध्ये व्यक्त होत आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
