तथाकथित समाजसेवक समाजसेवकांकडून नागरिकांची फसवणूक, तहसीलदारांनी चौकशीसाठी एकाला घेतले ताब्यात
धाराशिव जिल्ह्यात समाजसेवक असल्याचे भासवून नागरिकांची दिशाभूल करून आर्थिक फसवणूक केल्याचा गंभीर प्रकार उघडकीस आला आहे. उमरगा तालुक्यातील एका व्यक्तीवर मेंढा गावातील नागरिकांकडून रेशन कार्ड काढून देतो, असे सांगून ५ हजार रुपयांची मागणी केल्याचा आरोप करण्यात आला आहे.
या संदर्भात तहसीलदार कार्यालयाकडे प्राप्त झालेल्या तक्रारीनंतर तहसीलदार मृणाल जाधव यांनी तात्काळ दखल घेत संबंधित व्यक्तीस चौकशीसाठी तहसील कार्यालयात थांबवून ठेवले आहे. प्राथमिक माहितीनुसार, मेंढा गावात नागरिकांकडून पैसे घेताना किरकोळ बाचाबाची झाल्याचीही चर्चा आहे.
तक्रारीत नमूद करण्यात आले आहे की, संबंधित व्यक्ती स्वतःला समाजसेवक आणि सामाजिक कार्यकर्ता म्हणून घेत होता. तसेच जिल्ह्यातील जिल्हाधिकारी यांच्यासह वरिष्ठ अधिकाऱ्यांसोबत घेतलेल्या फोटोसेशनचा वापर करून त्या फोटोंच्या आधारे ग्रामीण भागातील नागरिकांमध्ये आपली प्रतिमा उंचावण्याचा प्रयत्न करत असल्याचा आरोपही करण्यात आला आहे. अतिवृष्टी व विविध शासकीय योजनांच्या माध्यमातून मदत मिळवून देतो, असे सांगत अनेक नागरिकांची फसवणूक केल्याचीही माहिती समोर येत आहे.
या प्रकरणी बेंबळी पोलीस ठाण्यात एनसी (NC) दाखल असल्याची माहिती मिळाली आहे. दरम्यान, संबंधित व्यक्तीने इतर किती नागरिकांची फसवणूक केली आहे याचा सखोल तपास सुरू असून तक्रारदारासही समोरासमोर चौकशीसाठी बोलावण्यात आल्याचे तहसीलदार यांनी सांगितले.
तहसीलदार मृणाल जाधव यांनी सांगितले की, संपूर्ण प्रकरणाची चौकशी करून आवश्यक ती कायदेशीर कारवाई केली जाईल. तसेच संबंधित व्यक्तीविरोधात इतर ठिकाणीही फसवणुकीचे काही गुन्हे दाखल आहेत का याबाबत पोलिसांकडून माहिती मागविण्यात आली आहे.
या घटनेमुळे जिल्ह्यात प्रशासनात खळबळ उडाली असून महसूल प्रशासनाकडून पुढील तपास सुरू आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
