अवैध गुटख्यावर आनंदनगर पोलिसांचा दणका! हजारोंचा मुद्देमाल जप्त; विक्रीसाठी गुटखा बाळगणाऱ्यावर गुन्हा दाखल
धाराशिव | लोकविचार
महाराष्ट्र शासनाने प्रतिबंधित केलेला गुटखा व तत्सम पदार्थ विक्रीसाठी जवळ बाळगणाऱ्या एका व्यक्तीवर आनंदनगर पोलिसांनी कारवाई करत ₹४ हजार ६८० किमतीचा गुटखा व पान मसाला जप्त केला. पोलिसांच्या या कारवाईमुळे अवैध गुटखा विक्री करणाऱ्यांमध्ये खळबळ उडाली आहे.
पोलिसांनी दिलेल्या माहितीनुसार, सुनिल बापु शितोळे (वय ४१, रा. किनी, ता. जि. धाराशिव) हा दि. २९ ऑगस्ट २०२६ रोजी दुपारी सुमारे २.२० वाजता तुळजाभवानी पेट्रोल पंपाच्या उजव्या बाजूस असलेल्या सुदर्शन पानस्टॉल परिसरात गुटखा विक्रीसाठी जवळ बाळगताना आढळून आला.
आनंदनगर पोलीस ठाण्याच्या पथकाने केलेल्या कारवाईत गुटखा के.आर. १००० पान मसाला २० पुड्या, गोवा पान मसाला ४ पाउच, बादशाहा पान मसाला ६ पाउच आणि विमल पान मसाला ५ पाउच, असा एकूण ₹४,६८० किमतीचा मुद्देमाल जप्त करण्यात आला.
या प्रकरणी आनंदनगर पोलीस ठाण्यात संबंधित व्यक्तीविरुद्ध भारतीय न्याय संहिता कलम २२३, २७४ व २७५ अन्वये गुन्हा दाखल करण्यात आला आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
