अनुदानित अध्यापक विद्यालयात २५ लाखांच्या फी घोटाळ्याचा आरोप! CID चौकशीची मागणी…
धाराशिव Lokvichar – लोकविचार
धाराशिव येथील श्री. स्वामी विवेकानंद शिक्षण संस्था, कोल्हापूर संचलित अनुदानित अध्यापक विद्यालयावर शैक्षणिक वर्ष 2018-19 पासून विद्यार्थ्यांकडून शासनाने निश्चित केलेल्या शुल्कापेक्षा जादा फी आकारून सुमारे २५ लाख रुपयांचा आर्थिक घोटाळा केल्याचा गंभीर आरोप करण्यात आला आहे. या प्रकरणी संबंधित विभागांकडे निवेदन देऊन तातडीने चौकशी करून कठोर कारवाईची मागणी करण्यात आली आहे.
निवेदनानुसार, शासन निर्णयानुसार अध्यापक विद्यालयाची वार्षिक ट्युशन फी ₹3,300 असताना प्रथम व द्वितीय वर्षाच्या विद्यार्थ्यांकडून ₹6,500 शुल्क आकारण्यात आले. म्हणजेच प्रत्येक विद्यार्थ्याकडून ₹3,200 अतिरिक्त रक्कम वसूल करण्यात आल्याचा आरोप आहे. दरवर्षी सुमारे 100 विद्यार्थ्यांकडून ही रक्कम घेतली गेल्याने गेल्या आठ वर्षांत सुमारे ₹25 लाखांची अतिरिक्त वसुली झाल्याचा दावा करण्यात आला आहे.
तसेच अतिरिक्त फी रोखीने स्वीकारून विद्यार्थ्यांना कोणतीही अधिकृत पावती देण्यात आली नाही, असा गंभीर आरोपही निवेदनात करण्यात आला आहे. अनुदानित संस्था असूनही शासनाच्या शुल्क नियमांचे उल्लंघन करून विद्यार्थ्यांची आर्थिक फसवणूक करण्यात आल्याचा तसेच रोख व्यवहारांमुळे कर यंत्रणेचीही दिशाभूल झाल्याचा आरोप करण्यात आला आहे.
या प्रकरणात संस्थेची मान्यता व अनुदान रद्द करावे, संस्था चालक व प्रभारी प्राचार्यांविरुद्ध IPC कलम 420 व 120(B) अंतर्गत फौजदारी गुन्हा दाखल करावा, विद्यार्थ्यांकडून जादा वसूल केलेली सुमारे ₹25 लाखांची रक्कम व्याजासह परत करावी तसेच संपूर्ण प्रकरणाची CID किंवा आर्थिक गुन्हे शाखेमार्फत सखोल चौकशी करावी, अशी मागणी निवेदनातून करण्यात आली आहे.
यासंदर्भातील निवेदन शिक्षण आयुक्त, पुणे, जिल्हाधिकारी धाराशिव, शिक्षणाधिकारी (प्राथमिक), SCERT संचालक आणि शालेय शिक्षण मंत्री यांच्यासह संबंधित विभागांना सादर करण्यात आले आहे. या प्रकरणाची तातडीने चौकशी न झाल्यास उच्च न्यायालयात याचिका दाखल करण्यात येणार असल्याचा इशाराही निवेदनकर्त्यांनी दिला आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
