नळदुर्गमध्ये मतदार (SIR) नोंदणीचा गोंधळ बीएलओचा ठावठिकाणा नाही! नगरसेवक ‘विश्रांती’ मोडवर!
लोकमदत न्यूज ( नळदुर्ग अझहर शेख )
नळदुर्ग शहरात सध्या मतदार यादी पुनरीक्षण (SIR) कार्यक्रम युद्धपातळीवर सुरू असताना, प्रशासनातील अनास्था आणि लोकप्रतिनिधींच्या निष्क्रियतेमुळे संपूर्ण प्रक्रिया गोंधळात सापडल्याचे चित्र दिसत आहे. ‘एकही मतदार वंचित राहणार नाही’ असा दावा निवडणूक आयोगाकडून केला जात असला तरी प्रत्यक्षात नागरिकांना आपल्या भागातील बीएलओ (बूथ लेव्हल ऑफिसर) कोण आहे, हे शोधण्यासाठी भटकंती करावी लागत आहे. अनेक प्रभागांमध्ये बीएलओंची कोणतीही पूर्वसूचना न देता सर्वेक्षण सुरू असल्याने नागरिकांमध्ये संभ्रम आणि भीतीचे वातावरण निर्माण झाले आहे. काही कर्मचारी ओळखपत्र न लावता येत असल्याने संशय अधिकच वाढला असून, “आमचे नाव मतदार यादीत राहील की कापले जाईल?” या प्रश्नाने सामान्य नागरिक त्रस्त झाले आहेत.
दरम्यान, प्रभागाच्या विकासासाठी आश्वासने देत निवडून आलेले नगरसेवक या महत्त्वाच्या प्रक्रियेत पूर्णपणे निष्क्रिय असल्याचे चित्र समोर येत आहे. नागरिकांच्या अडीअडचणीच्या वेळी मदतीसाठी पुढे येण्याऐवजी लोकप्रतिनिधींनी ‘विश्रांती’ घेतल्याचा आरोप नागरिकांकडून होत आहे. आपल्या प्रभागात कोणता बीएलओ कार्यरत आहे, याची माहिती जाहीर करणे, संपर्क क्रमांक उपलब्ध करून देणे किंवा सोशल मीडियाद्वारे जनतेपर्यंत माहिती पोहोचवणे ही जबाबदारी पार पाडली जात नसल्याने नागरिकांमध्ये संताप वाढत आहे. प्रशासन आणि नागरिक यांच्यातील दुवा म्हणून काम करण्याऐवजी नेते केवळ निवडणुकीच्या वेळीच सक्रिय होतात का, असा सवाल उपस्थित केला जात आहे.
नळदुर्गकरांनी आता केवळ आश्वासनांवर न राहता प्रत्यक्ष कृतीची मागणी केली आहे. प्रत्येक प्रभागातील नगरसेवकांनी तातडीने बीएलओचे नाव, संपर्क क्रमांक आणि सर्वेक्षणाची वेळ जाहीर करावी, जेणेकरून एकही पात्र मतदार यादीतून वंचित राहणार नाही, अशी मागणी होत आहे. मतदान हा प्रत्येक नागरिकाचा मूलभूत हक्क असताना, त्या हक्काच्या संरक्षणासाठीच नागरिकांना संघर्ष करावा लागत असल्याने लोकशाही प्रक्रियेवर प्रश्नचिन्ह निर्माण झाले आहे. त्यामुळे प्रशासनाने पारदर्शकता वाढवून ही प्रक्रिया सुलभ करावी आणि नगरसेवकांनी आपल्या जबाबदारीचे भान ठेवून सक्रिय भूमिका बजावावी, अशी अपेक्षा व्यक्त होत आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
