तुळजाभवानी मंदिर VIP पास वाटपावर प्रश्नचिन्ह कारवाई न झाल्यास आंदोलन छेडणार – गणेश पाटील
तुळजापूर | लोकमदत न्यूज
तुळजापूर येथील श्री तुळजाभवानी मंदिर संस्थानमध्ये गेल्या दोन ते तीन वर्षांपासून सुरू असलेल्या VIP पास वाटपाच्या कथित गैरप्रकारांबाबत आता गंभीर प्रश्न उपस्थित करण्यात आले आहेत. या संदर्भात अखिल भारतीय भ्रष्टाचार निर्मूलन संघर्ष समितीच्या वतीने शासन व प्रशासनाला निवेदन सादर करण्यात आले असून, या निवेदनावर समितीचे पदाधिकारी गणेश पाटील यांची स्वाक्षरी असल्याचे नमूद करण्यात आले आहे.
निवेदनानुसार, मंदिरात VIP पास देताना नियमांची पायमल्ली होत असल्याचा आरोप करण्यात आला आहे. विशेष म्हणजे, काही विशिष्ट व्यक्तींनाच प्राधान्य देत VIP पास वाटप केले जात असल्याचे नमूद करण्यात आले आहे. त्यामुळे सर्वसामान्य भाविकांमध्ये नाराजीचे वातावरण निर्माण झाले असून, मंदिर प्रशासनाच्या पारदर्शकतेवरही प्रश्नचिन्ह उपस्थित झाले आहे.
संघटनेच्या म्हणण्यानुसार, मंदिर संस्थानने शासनाने ठरवलेल्या नियमांनुसारच VIP पास वाटप करणे आवश्यक आहे. परंतु प्रत्यक्षात अधिकारी वर्गाच्या मनमानी पद्धतीने पास दिले जात असल्याचा आरोप करण्यात आला आहे. त्यामुळे VIP पाससंदर्भातील संपूर्ण प्रक्रिया पारदर्शक व नियमबद्ध करण्याची मागणी करण्यात आली आहे.
तसेच, निवेदनात पुढे नमूद करण्यात आले आहे की, मंदिरातील काही अधिकाऱ्यांकडून VIP पास वाटपात अनियमितता होत असल्याचे दिसून येत आहे. याप्रकरणी . जबाबदार अधिकाऱ्यांवर योग्य ती चौकशी करून कठोर कारवाई करण्यात यावी, अशी ठाम भूमिका संघटनेने घेतली आहे.
याशिवाय, आतापर्यंत झालेल्या VIP पास वाटपाची सखोल चौकशी करून, दोषी आढळणाऱ्यांवर कायद्याच्या चौकटीत राहून कारवाई करावी, अशी मागणी करण्यात आली आहे. तसेच, मंदिर संस्थानचे जनसंपर्क अधिकारी (PRO) व सुरक्षा यंत्रणेची भूमिकाही तपासण्याची गरज असल्याचे निवेदनात स्पष्ट करण्यात आले आहे.
महत्त्वाचे म्हणजे, जर १५ दिवसांच्या आत या प्रकरणात कोणतीही ठोस कारवाई झाली नाही, तर संबंधित संघटनेच्या वतीने मंदिर कार्यालयासमोर तीव्र आंदोलन छेडण्याचा इशाराही देण्यात आला आहे. त्यामुळे प्रशासनासमोर आता या प्रकरणात तातडीने निर्णय घेण्याचे आव्हान उभे ठाकले आहे.
दरम्यान, या निवेदनाची दखल घेऊन जिल्हाधिकारी, तहसीलदार तसेच मंदिर संस्थान प्रशासनाने योग्य ती पावले उचलावीत, अशी अपेक्षा व्यक्त केली जात आहे. संपूर्ण प्रकरणाची निष्पक्ष चौकशी होऊन भाविकांना न्याय मिळेल का, याकडे सर्वांचे लक्ष लागले आहे.
