धाराशिव नगर परिषदेतील २२ रिक्त पदे तातडीने भरा खासदार ओमराजे निंबाळकर यांचे उपमुख्यमंत्री एकनाथ शिंदे यांना निवेदन
रिक्त पदांमुळे शहर विकास व नागरिकांच्या मूलभूत सेवांवर परिणाम; राज्यस्तरीय संवर्गातील पदे भरण्याची मागणी
धाराशिव लोकविचार
धाराशिव नगर परिषदेतील राज्यस्तरीय संवर्गातील तब्बल २२ रिक्त पदे तातडीने भरावीत, अशी मागणी धाराशिवचे खासदार ओमप्रकाश (ओमराजे) राजेनिंबाळकर यांनी महाराष्ट्राचे उपमुख्यमंत्री एकनाथ शिंदे यांच्याकडे निवेदनाद्वारे केली आहे.
खासदार राजेनिंबाळकर यांनी पत्रात नमूद केले आहे की, १२ फेब्रुवारी २०२८ च्या आकृतिबंधानुसार धाराशिव ‘अ’ वर्ग नगर परिषदेच्या आस्थापनेवर एकूण ३८ पदे मंजूर आहेत. त्यापैकी सध्या केवळ १६ पदांवर कर्मचारी कार्यरत असून २२ पदे रिक्त आहेत.
या मोठ्या प्रमाणावरील रिक्त पदांमुळे धाराशिव शहर विकासाची कामे, दैनंदिन प्रशासकीय कामकाज तसेच नागरिकांना मिळणाऱ्या मूलभूत सुविधांवर परिणाम होत असल्याचे त्यांनी पत्रात अधोरेखित केले आहे. मनुष्यबळाच्या कमतरतेमुळे विविध विकासकामांना गती मिळत नसून प्रशासनावर अतिरिक्त ताण निर्माण होत असल्याचेही त्यांनी नमूद केले.
राज्यस्तरीय संवर्गातील ही रिक्त पदे तातडीने भरल्यास नगर परिषदेचे दैनंदिन कामकाज सुरळीत होईल, शहर विकासाच्या योजनांना वेग मिळेल आणि नागरिकांना अधिक चांगल्या सुविधा उपलब्ध होतील, असे खासदार राजेनिंबाळकर यांनी म्हटले आहे.
त्यामुळे धाराशिव नगर परिषदेतील सर्व रिक्त पदांवर लवकरात लवकर कर्मचाऱ्यांची नियुक्ती करण्यासाठी आपल्या स्तरावर आवश्यक ती कार्यवाही करावी, अशी विनंती त्यांनी उपमुख्यमंत्री एकनाथ शिंदे यांच्याकडे केली आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
