नगरसेवक गणेश घोडके यांच्या पाठपुराव्याने बंद बोरवेल पुन्हा सुरू…आठवडी बाजार परिसरातील पाणीटंचाईला अखेर दिलासा;

धाराशिव | लोकविचार

धाराशिव नगर परिषदेच्या प्रभाग क्रमांक १२ मधील आठवडी बाजार परिसरातील नागरिकांचा अनेक वर्षांपासून प्रलंबित असलेला पाणीप्रश्न अखेर मार्गी लागला आहे. नगरसेवक गणेश घोडके यांच्या सातत्यपूर्ण पाठपुराव्यामुळे या भागातील बंद पडलेली बोरवेल पुन्हा सुरू करण्यात आली असून नागरिकांना मोठा दिलासा मिळाला आहे.

प्रभाग क्रमांक १२ मध्ये इंदिरानगर, वडार गल्ली, आगड गल्ली, झोरे गल्ली तसेच आठवडी बाजार परिसर या बरोबरच सांजा रोड कडील काही भाग समावेश होतो. या प्रभागातील काही भागात मोलमजुरी करून उदरनिर्वाह करणाऱ्या कुटुंबांची संख्या मोठ्या प्रमाणात आहे.

आर्थिकदृष्ट्या सर्वसामान्य नागरिक वास्तव्यास असलेल्या या परिसरात मागील एक वर्षापासून पाण्याची तीव्र टंचाई जाणवत होती. पिण्याच्या पाण्यासाठी नागरिकांना मोठी पायपीट करावी लागत होती, तर अनेकांना विकत पाणी घेऊन घरगुती गरजा भागवाव्या लागत होत्या.

या समस्येबाबत स्थानिक नागरिकांनी वारंवार नगरसेवक गणेश घोडके यांच्याकडे मागणी केली होती. नागरिकांच्या अडचणीची गांभीर्याने दखल घेत त्यांनी आठवडी बाजार परिसरातील अनेक वर्षांपासून बंद अवस्थेत असलेल्या कूपनलिकेची (बोरवेल) माहिती घेतली. त्यानंतर संबंधित विभागाकडे सातत्याने पाठपुरावा करून ही बोरवेल पुन्हा कार्यान्वित करण्यासाठी प्रयत्न केले.

अखेर प्रशासनाच्या सहकार्याने बंद पडलेली बोरवेल सुरू करण्यात यश आले आणि परिसरातील नागरिकांचा पाण्याचा प्रश्न मोठ्या प्रमाणात सुटला. यामुळे नागरिकांना आता पाण्यासाठी भटकंती करावी लागणार नसून दैनंदिन जीवन अधिक सुलभ होणार आहे.

बोरवेल सुरू झाल्यानंतर परिसरातील नागरिकांनी नगरसेवक गणेश घोडके तसेच संबंधित प्रशासनाचे आभार व्यक्त केले. “आमच्या पाण्याचा प्रश्न अनेक वर्षांपासून प्रलंबित होता. आता तो मार्गी लागल्याने मोठा दिलासा मिळाला आहे,” अशी भावना नागरिकांनी व्यक्त केली.

विशेष म्हणजे, घरासमोर पाण्याची सुविधा उपलब्ध झाल्याने अनेक महिलांच्या डोळ्यांत आनंदाश्रू तरळले. रोजच्या पाण्यासाठीची धावपळ आणि त्रास संपल्याने परिसरात समाधानाचे वातावरण निर्माण झाले आहे.

आमदार राणाजगजितसिंह पाटील, मल्हार पाटील यांच्या मार्गदर्शनाखाली धाराशिव नगर परिषद मध्ये भाजपची एकहाती सत्ता असल्याने नगरसेवक गणेश घोडके यांनी नगराध्यक्ष नेहा राहुल काकडे तसेच नगरपरिषद गटनेते अमित शिंदे यांच्या कडे पाठपुरावा करून प्रभागातील मूलभूत सुविधा उपलब्ध करून देण्यासाठी आपण कटिबद्ध असल्याचे त्यांनी स्पष्ट केले.

सर्वसामान्य नागरिकांच्या मूलभूत गरजांकडे लक्ष देत विकासकामांना प्राधान्य देण्याची भूमिका नगरसेवक गणेश घोडके यांनी घेतली असून, त्यांच्या या पुढाकारामुळे प्रभाग क्रमांक १२ मधील आठवडी बाजार परिसरातील नागरिकांना मोठा दिलासा मिळाल्याची भावना व्यक्त होत आहे.

लोकविचार सत्य शोधून लिहिण्याची ताकद संपादक अमजद सय्यद 8390088786