धाराशिव एलसीबीची धाडसी मोहीम फत्ते; 10 कोटींच्या हशिश ऑईल तस्करीतील मुख्य आरोपी ओडिशातील नक्षलग्रस्त भागातून जेरबंद
धाराशिव लोकविचार
नळदुर्ग पोलीस ठाण्यात दाखल असलेल्या तब्बल 10 कोटी 38 लाख 20 हजार रुपये किमतीच्या हशिश ऑईल तस्करी प्रकरणातील मुख्य आरोपीला ओडिशा राज्यातील अतिशय दुर्गम व नक्षलप्रभावित पहाडी भागातून ताब्यात घेत स्थानिक गुन्हे शाखेने धाडसी मोहीम यशस्वी केली आहे. या कारवाईमुळे धाराशिव पोलिसांच्या तांत्रिक तपास कौशल्याची पुन्हा एकदा प्रचिती आली आहे.दि. 19 एप्रिल 2026 रोजी रात्री नळदुर्ग परिसरात नाकाबंदी सुरू असताना पोलिसांना पाहून अमली पदार्थ तस्करांनी त्यांच्या ताब्यातील हशिश ऑईलने भरलेली बॅग कारमधून फेकून पळ काढला होता. त्यानंतर नळदुर्ग पोलिसांनी घटनास्थळावरून मोठ्या प्रमाणात हशिश ऑईल जप्त करत पोलीस स्टेशन नळदुर्ग येथे गुन्हा क्रमांक 114/2026 अंतर्गत NDPS Act कलम 8(क), 20(ब), 20(ii)(C), 25 व 29 प्रमाणे गुन्हा दाखल केला होता.या प्रकरणाचा तपास पोलीस अधीक्षक श्रीमती रितु खोखर, अपर पोलीस अधीक्षक श्रीमती शफकत आमना तसेच स्थानिक गुन्हे शाखेचे पोलीस निरीक्षक विनोद इज्जपवार यांच्या मार्गदर्शनाखाली सुरू होता. तांत्रिक तपासादरम्यान दोन आरोपींना यापूर्वी नाशिक-मालेगाव परिसरातून अटक करण्यात आली होती. मात्र, हशिश ऑईलचा मुख्य पुरवठादार आणि विक्रेता अद्याप फरार होता.तपासादरम्यान पोलिसांना ओडिशा राज्यातील प्रसेनजित ख्रिमहन दास हा या रॅकेटमधील मुख्य आरोपी असल्याची माहिती मिळाली. मात्र, त्याचे वास्तव्य, ओळख आणि हालचालींबाबत कोणतीही ठोस माहिती उपलब्ध नव्हती. त्यामुळे आरोपीचा शोध घेणे पोलिसांसमोर मोठे आव्हान होते.दि. 06 मे 2026 रोजी पोलीस अधीक्षक श्रीमती रितु खोखर यांच्या आदेशानुसार पोलीस निरीक्षक विनोद इज्जपवार यांच्या मार्गदर्शनाखाली स्थानिक गुन्हे शाखेचे सहाय्यक पोलीस निरीक्षक सचिन खटके, पोलीस हवालदार विनोद जानराव, नितीन जाधवर, बबन जाधवर, चापो हवालदार महेबुब अरब व रोहित दंडनाईक यांचे विशेष पथक ओडिशा राज्यात रवाना करण्यात आले.तांत्रिक माहिती आणि स्थानिक सूत्रांच्या मदतीने आरोपी हा ओडिशातील जनतापाई या अतिशय दुर्गम, पहाडी आणि नक्षलप्रभावित भागात राहत असल्याची खात्रीशीर माहिती पथकाला मिळाली. त्यानंतर पोलीस अधीक्षक श्रीमती रितु खोखर यांनी दिलेल्या विशेष सूचना आणि मार्गदर्शनानुसार पथकाने अत्यंत धाडसी कारवाई करत दि. 08 मे 2026 रोजी आरोपी प्रसेनजित ख्रिमहन दास (वय 33, रा. ओडिशा राज्य) याला यशस्वीरित्या ताब्यात घेतले.सदर आरोपीस पुढील कार्यवाहीसाठी नळदुर्ग पोलीस ठाण्यात हजर करण्यात आले असून या प्रकरणातील आणखी धक्कादायक माहिती समोर येण्याची शक्यता पोलिसांकडून व्यक्त करण्यात येत आहे.स्थानिक गुन्हे शाखेच्या या धाडसी आणि नियोजनबद्ध कारवाईमुळे धाराशिव पोलिसांचे राज्यभरातून कौतुक होत असून, अमली पदार्थ तस्करीविरोधातील पोलिसांची आक्रमक भूमिका पुन्हा अधोरेखित झाली आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
