धाराशिव शहर पोलिसांची अवैध दारूविरोधात मोठी धडक कारवाई ; ११ ठिकाणी छापे, लाखोंचा मुद्देमाल जप्त
धाराशिव लोकविचार
धाराशिव शहरात अवैध गावठी दारू विक्री आणि निर्मिती व विक्री करणाऱ्यांविरोधात धाराशिव शहर पोलीस ठाण्याच्या विशेष पथकाने मोठी मोहीम राबवत एकाच दिवशी तब्बल ११ ठिकाणी धाडसत्र राबवून मोठी कारवाई केली. या कारवाईत मोठ्या प्रमाणावर गावठी दारू तसेच दारू निर्मितीसाठी वापरले जाणारे गुळमिश्रीत रासायनिक द्रव जप्त करण्यात आले असून अनेक आरोपींवर गुन्हे दाखल करण्यात आले आहेत.
ही संपूर्ण कारवाई पोलीस अधीक्षक रितू खोखर, उपविभागीय पोलीस अधिकारी सुरेशकुमार राऊत यांच्या मार्गदर्शनाखाली धाराशिव शहर पोलीस ठाण्याचे पोलीस निरीक्षक कुमार दराडे यांच्या आदेशान्वये विशेष पथकाने केली.
पोलीस पथकाने शहरातील इंदीरानगर, पारधी पिढी, वडार गल्ली, तुळजापूर रोड, सांजा रोड, बार्शी रोड परिसरात छापे टाकून अवैध दारू विक्री करणाऱ्यांवर कारवाई केली. या कारवाईत सुरेख राजेंद्र आयवळे, बालाजी कठारे, नंदा पवार, आशाबाई चव्हाण, जितेंद्र पाटील, नगीना काळे, नानीबाई पवार, दत्ता कांबळे, किरण कांबळे, पिराजी पवार तसेच गजरुबाई ऊर्फ गौरी पवार यांच्याकडून मोठ्या प्रमाणावर गावठी दारू आणि दारू निर्मितीसाठी लागणारा रासायनिक साठा जप्त करण्यात आला.
विशेषतः पारधी पिढी परिसरात करण्यात आलेल्या कारवाईत शेकडो लिटर गुळमिश्रीत रासायनिक द्रव जप्त करण्यात आल्याने अवैध दारू निर्मितीचे मोठे रॅकेट उघडकीस आल्याची चर्चा शहरात सुरू आहे.
पोलिसांनी जप्त केलेला मुद्देमाल लाखोंच्या घरात असून या कारवाईमुळे अवैध दारू व्यवसाय करणाऱ्यांमध्ये मोठी खळबळ उडाली आहे.धाराशिव शहर पोलीस ठाण्याच्या अधिकारी आणि कर्मचाऱ्यांनी अत्यंत नियोजनबद्ध पद्धतीने ही मोहीम राबवत शहरातील अवैध धंद्यांविरोधात कठोर भूमिका घेतली आहे.
पोलीस अधीक्षक रितू खोखर यांच्या नेतृत्वाखाली जिल्ह्यात सुरू असलेल्या अवैध व्यवसायविरोधी मोहिमेला या कारवाईमुळे अधिक बळ मिळाले असून नागरिकांकडूनही पोलिसांच्या कामगिरीचे कौतुक होत आहे.
पोलीस निरीक्षक कुमार दराडे यांनी नागरिकांनी अवैध दारू विक्री तसच अवैध धंद्याबाबत काही माहिती मिळाल्यास तात्काळ पोलिसांना कळवावे, असे आवाहन केले असून अशा कारवाया पुढेही सुरू राहणार असल्याचा इशाराही दिला आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
