परभणी ड्रग्ज तस्करी प्रकरणात मोहसीन मिर्झाला सशर्त जामीन मंजूर;
कळंब ड्रग्ज प्रकरणातील रेवण नखाते आणि अनीस तांबोळीला १५ ऑक्टोबरपर्यंत वाढीव पोलीस कोठडी
धाराशिव | लोकविचार
परभणी येथील ड्रग्ज तस्करी प्रकरणात कळंबचे नगरसेवक मोहसीन सलीम मिर्झा याच्यासह सहा आरोपींना परभणी जिल्हा न्यायालयाने सशर्त जामीन मंजूर केला आहे. मात्र, कळंब येथील ड्रग्ज तस्करी प्रकरणात मोहसीन मिर्झा आणि लखन गायकवाड यांचा नियमित जामीन अर्ज धाराशिव न्यायालयाने फेटाळला आहे. दरम्यान, कळंब ड्रग्ज प्रकरणातील आरोपी रेवण सोपान नखाते आणि त्याला ड्रग्ज पुरवठा केल्याचा आरोप असलेल्या कळंबच्या समतानगर परिसरातील अनीस अमरोद्दीन तांबोळी या दोघांना १५ ऑक्टोबरपर्यंत वाढीव पोलीस कोठडी सुनावण्यात आली आहे.
परभणी जिल्ह्यातील मानवत पोलीस ठाण्यात गुन्हा क्रमांक ३६५/२०२६ नुसार दाखल झालेल्या ड्रग्ज तस्करी प्रकरणात पोलिसांनी तपासादरम्यान आंतरजिल्हा टोळीचा पर्दाफाश केला होता. पोलीस अधीक्षक पंकज कुमावत आणि अपर पोलीस अधीक्षक तानाजी चिखले यांच्या मार्गदर्शनाखाली, पोलीस निरीक्षक गजेंद्र सरोदे यांच्या नेतृत्वात ही कारवाई करण्यात आली. या प्रकरणाचा तपास पोलीस निरीक्षक दर्शन शिंदे करीत आहेत.
या प्रकरणात सुरुवातीला २७ जुलै रोजी अलीम शेख खाजा (रा. पाथरी) आणि शाहरुख फिरोजखान पठाण (रा. अंबाजोगाई, जि. बीड) यांना १४ लाख ६३ हजार रुपये किमतीच्या ७२ ग्रॅम ड्रग्जसह अटक करण्यात आली होती. त्यानंतर तपासादरम्यान ७ ऑगस्ट रोजी कळंबचा नगरसेवक मोहसीन सलीम मिर्झा याच्यासह अकीब अक्रम मोमीन, बाबा मोमीन रफीक, सय्यद समीर सय्यद शब्बीर, शेख सलमान शेख इरफान आणि अयान नासेर पठाण या सहा जणांना अटक करण्यात आली होती. या सहा आरोपींना आता परभणी जिल्हा न्यायालयाने सशर्त जामीन मंजूर केला आहे.
मात्र, परभणी प्रकरणात जामीन मिळाला असला, तरी कळंब येथील स्वतंत्र ड्रग्ज तस्करी गुन्ह्यातील कायदेशीर प्रक्रिया सुरूच आहे. या प्रकरणात मोहसीन मिर्झा आणि लखन गायकवाड यांना धाराशिव न्यायालयाकडून नियमित जामीन मिळालेला नाही. त्यामुळे परभणी प्रकरणातील जामीन आणि कळंब प्रकरणातील न्यायालयीन कारवाई या दोन स्वतंत्र बाबी ठरल्या आहेत.
दरम्यान, कळंब ड्रग्ज तस्करी प्रकरणात रेवण नखाते आणि अनीस तांबोळी यांना १५ ऑक्टोबरपर्यंत पोलीस कोठडी वाढवून देण्यात आल्याने या प्रकरणातील पुढील तपासाकडे लक्ष लागले आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
