प्लास्टिकमुक्त धाराशिवसाठी नागरिक-व्यापाऱ्यांनी सहकार्य करावे; नियमभंग करणाऱ्यांवर कारवाई सुरूच राहणार — मुख्याधिकारी नीता अंधारे
धाराशिव नगरपरिषदेची प्लास्टिकविरोधात धडक कारवाई; २५० किलो प्लास्टिक जप्त, ६ दुकानदारांना २३ हजारांचा दंड
धाराशिव लोकविचार
शहर प्लास्टिकमुक्त व स्वच्छ ठेवण्यासाठी धाराशिव नगरपरिषद प्रशासनाच्या वतीने प्लास्टिक बंदीची अंमलबजावणी अधिक कडक केली आहे.
मुख्याधिकारी नीता अंधारे यांच्या मार्गदर्शनाखाली नगरपरिषदेच्या विशेष पथकाने शहरातील विविध बाजारपेठा व व्यावसायिक आस्थापनांची अचानक तपासणी केली.या कारवाईदरम्यान ६ दुकानदारांकडून तब्बल २५० किलो प्रतिबंधित प्लास्टिक पिशव्या जप्त करण्यात आल्या. नियमांचे उल्लंघन करणाऱ्या संबंधित दुकानदारांवर एकूण २३ हजार रुपयांचा दंड ठोठावण्यात आला.
नगरपरिषदेने यापुढेही प्लास्टिकचा वापर, साठा किंवा विक्री आढळल्यास अधिक कठोर कारवाई करण्याचा इशारा दिला आहे. गरज पडल्यास दुकान सील करण्यासह कायदेशीर कारवाई केली जाणार असल्याचे प्रशासनाने स्पष्ट केले.
स्वच्छ व पर्यावरणपूरक धाराशिवसाठी नगरपरिषदेचा हा उपक्रम निश्चितच कौतुकास्पद असून, नागरिक आणि व्यापाऱ्यांनीही प्रशासनाच्या प्लास्टिकमुक्त शहराच्या मोहिमेला सहकार्य करण्याचे आवाहन करण्यात आले आहे.
प्लास्टिक पिशव्यांऐवजी कापडी किंवा कागदी पिशव्यांचा वापर करण्याचे आवाहनही नगरपरिषद प्रशासनाने केले आहे.
Lokvichar – लोकविचार सत्य शोधून लिहिण्याची ताकद संपादक अमजद सय्यद 083900 88786
