न.प.उपाध्यक्ष अक्षय ढोबळेंनी नगराध्यक्षांसह शहराध्यक्षांना डावलले? पोस्टरमधून तिघांचे फोटो गायब चर्चांना उधाण!
धाराशिव | लोकविचार
धाराशिव नगरपरिषदेत उपाध्यक्षपदाच्या बदलाच्या चर्चांनी जोर धरलेला असतानाच उपाध्यक्ष अक्षय ढोबळे यांच्या नव्या पोस्टर डिझाईनमुळे शहरातील राजकीय वातावरण आणखी तापले आहे. यापूर्वी प्रत्येक होर्डिंग, पोस्टर आणि सोशल मीडियावरील डिझाईनमध्ये पक्षाचे शहराध्यक्ष तथा धाराशिव नगरपालिकेचे गटनेते अमित शिंदे, नगराध्यक्षा नेहा राहुल काकडे तसेच भारतीय जनता युवा मोर्चाचे जिल्हाध्यक्ष तथा नगरसेवक राहुल काकडे यांचे फोटो नियमितपणे झळकत होते. मात्र, आज प्रसिद्ध करण्यात आलेल्या डिझाईनमध्ये या तिघांचेही फोटो नसल्याचे दिसून आल्याने राजकीय वर्तुळात चर्चांना उधाण आले आहे.
नगरपरिषदेच्या निवडणुकीनंतर सुमारे सहा महिन्यांपूर्वी अक्षय ढोबळे यांची उपाध्यक्षपदी निवड झाली होती. त्यावेळी पक्षांतर्गत सहा महिन्यांनंतर दुसऱ्या नगरसेवकाला संधी देण्याबाबत सहमती झाल्याची चर्चा होती. आता सहा महिन्यांचा कालावधी पूर्ण झाल्यानंतरही उपाध्यक्षपदात कोणताही बदल झालेला नसल्याने या चर्चांना पुन्हा वेग आला आहे.
त्यातच नुकत्याच झालेल्या नगरपरिषदेच्या सर्वसाधारण सभेला उपाध्यक्षपदाचे दावेदार मानल्या जाणाऱ्या काही नगरसेवकांची अनुपस्थिती आणि त्यानंतर लगेचच प्रसिद्ध झालेल्या पोस्टरमधून पक्षाच्या प्रमुख पदाधिकाऱ्यांचे फोटो गायब झाल्याने अनेक तर्क-वितर्कांना सुरुवात झाली आहे.
विशेष म्हणजे, यापूर्वी अक्षय ढोबळे यांच्या सर्वच प्रसिद्धी साहित्यामध्ये शहराध्यक्ष तथा गटनेते अमित शिंदे, नगराध्यक्षा नेहा राहुल काकडे आणि भाजयुमो जिल्हाध्यक्ष तथा नगरसेवक राहुल काकडे यांना प्रमुख स्थान दिले जात होते. मात्र, नव्या डिझाईनमध्ये तिघांनाही वगळण्यात आल्याने हा केवळ डिझाईनमधील बदल आहे की त्यामागे पक्षांतर्गत नाराजी अथवा राजकीय संदेश दडलेला आहे, याबाबत शहरभर चर्चा रंगली आहे.
भाजपकडून उपाध्यक्षपदाच्या बदलाबाबत किंवा पोस्टरमधील या बदलाबाबत अद्याप कोणतीही अधिकृत भूमिका जाहीर करण्यात आलेली नाही. त्यामुळे नगरपरिषदेत लवकरच उपाध्यक्षपदात बदल होणार का, तसेच या पोस्टरमागील नेमके राजकारण काय, याकडे धाराशिवकरांचे लक्ष लागले आहे.
लोकविचार सत्य शोधून लिहिण्याची ताकद संपादक अमजद सय्यद 083900 88786
