“प्रामाणिक सेवेचा गौरव.. नगराध्यक्ष नेहा राहुल काकडे यांच्या हस्ते सेवानिवृत्त सेवक रसूल शेख यांचा सन्मान”
धाराशिव लोकविचार
धाराशिव नगर परिषदेचे नगराध्यक्ष कक्षातील सेवक रसूल शेख हे नियत वयोमानानुसार सेवानिवृत्त झाले. जवळपास अनेक वर्षे प्रामाणिकपणे, निष्ठेने आणि कर्तव्यभावनेने सेवा बजावणाऱ्या रसूल शेख यांच्या सेवानिवृत्तीप्रसंगी नगरपरिषदेत भावनिक वातावरणात त्यांचा सत्कार करण्यात आला.
नगराध्यक्ष नेहा राहुल काकडे यांच्या पुढाकारातून आयोजित या सत्कार समारंभात रसूल शेख यांच्या सेवेला गौरविण्यात आले. नगरपरिषदेच्या वतीने नगराध्यक्ष नेहा राहुल काकडे यांच्या हस्ते त्यांना शाल, श्रीफळ देऊन गौरविण्यात आले. तसेच नगरपरिषद प्रशासनाच्या वतीने कर निर्धारण व प्रशासकीय सेवा अधिकारी विश्वंभर सोनखेडकर व कार्यालयीन अधीक्षक तथा स्वच्छता अभियंता अभिजीत गोरे यांच्या हस्तेही त्यांचा सन्मान करण्यात आला.
यावेळी नगराध्यक्ष नेहा राहुल काकडे यांनी आपल्या मनोगतात सांगितले की, “नगरपरिषदेच्या प्रत्येक कर्मचाऱ्याचे योगदान महत्त्वाचे असते. अनेक वर्षे प्रामाणिकपणे सेवा बजावणाऱ्या कर्मचाऱ्यांचा सन्मान करणे ही नगरपरिषदेची आणि लोकप्रतिनिधींची जबाबदारी आहे. त्यांच्या कार्याचा गौरव करून नव्या पिढीसमोर आदर्श निर्माण करण्याचा हा प्रयत्न आहे.” सेवानिवृत्त कर्मचाऱ्यांचा सन्मान करण्याची ही परंपरा पुढेही कायम ठेवण्यात येईल, असेही त्यांनी स्पष्ट केले.
या कार्यक्रमाला राष्ट्रवादी काँग्रेस (शरदचंद्र पवार) पक्षाचे गटनेते खलिफा कुरेशी, बांधकाम सभापती अभिजीत काकडे, शिक्षण सभापती प्रवीण माळी, नगरसेवक राहुल काकडे,सुशांत सोनवणे,धनंजय पाटील यांच्यासह मुख्य लेखापाल तनवीर जमादार, पाणीपुरवठा सहाय्यक अभियंता रोहित मुंडे, पिंटू गायकवाड,विनय बिसले, निवृत्त कर्मचारी कोरवी, तसेच नगरसेवक व नगरपरिषदेतील सर्व अधिकारी, कर्मचारी मोठ्या संख्येने उपस्थित होते.
संपूर्ण सेवाकाळात शांत, शिस्तबद्ध आणि कर्तव्यनिष्ठपणे जबाबदाऱ्या पार पाडणाऱ्या रसूल शेख यांच्या कार्याचा उपस्थितांनी गौरव केला. त्यांच्या पुढील आयुष्यासाठी सर्वांनी शुभेच्छा व्यक्त करत त्यांना निरोगी, आनंदी आणि समाधानाचे जीवन लाभावे, अशी सदिच्छा व्यक्त करण्यात आली.
लोकविचार सत्य शोधून लिहिण्याची ताकद संपादक अमजद सय्यद 8390088786
