मल्हार पाटील यांच्या वाढदिवसानिमित्त शिक्षणाला प्रोत्साहन सभापती आकाश तावडे यांच्या वतीने विद्यार्थ्यांना स्कूल बॅगचे वाटप
धाराशिव लोकविचार
भाजपा नेते मल्हार राणाजगजितसिंह पाटील यांच्या वाढदिवसानिमित्त विविध सामाजिक उपक्रमांचे आयोजन करण्यात येत असून, त्याचाच एक भाग म्हणून धाराशिव नगर परिषदेचे सभापती तथा कुलस्वामिनी नॅचरल शुगरचे चेअरमन आकाश मधुकरराव तावडे यांच्या वतीने नगर परिषद शाळा क्रमांक १८, भानूनगर येथील विद्यार्थ्यांना शालेय दप्तरांचे (स्कूल बॅग) वाटप करण्यात आले. शिक्षणाला प्रोत्साहन देणारा आणि विद्यार्थ्यांच्या शैक्षणिक गरजांना हातभार लावणारा हा उपक्रम उत्साहपूर्ण वातावरणात पार पडला.
या उपक्रमामध्ये विद्यार्थ्यांना नवीन शालेय दप्तरांचे वितरण करण्यात आले. शैक्षणिक साहित्याचा लाभ मिळाल्याने विद्यार्थ्यांच्या चेहऱ्यावर आनंद ओसंडून वाहत होता. वाढदिवसाचे औचित्य साधून समाजोपयोगी कार्य करण्याची परंपरा जपत विद्यार्थ्यांच्या शिक्षणासाठी मदतीचा हात पुढे करणाऱ्या या उपक्रमाचे उपस्थितांनी कौतुक केले.
यावेळी बोलताना मल्हार राणाजगजितसिंह पाटील यांनी विद्यार्थ्यांच्या चेहऱ्यावरील आनंद, त्यांच्या शिक्षणासाठी दिलेले हे प्रोत्साहन आणि वाढदिवसाचे औचित्य साधून समाजहिताचे उपक्रम राबविण्याची प्रेरणादायी संकल्पना मनाला विशेष भावल्याचे सांगितले. समाजातील प्रत्येक घटकापर्यंत मदतीचा हात पोहोचविण्याची भावना अशा उपक्रमांतून अधिक दृढ होत असल्याचे त्यांनी नमूद केले.
नगरसेवक आकाश मधुकरराव तावडे यांनी अत्यंत आत्मीयतेने वाढदिवस साजरा करत सामाजिक बांधिलकी जपल्याबद्दल मल्हार राणाजगजितसिंह पाटील यांनी त्यांचे तसेच या उपक्रमात योगदान देणाऱ्या सर्व सहकाऱ्यांचे मनःपूर्वक आभार मानले. वाढदिवस केवळ शुभेच्छांचा सोहळा न राहता समाजासाठी काहीतरी सकारात्मक करण्याची संधी असते, असेही त्यांनी यावेळी सांगितले.
“समाजासाठी केलेली प्रत्येक छोटी कृती हीच उद्याच्या उज्ज्वल भविष्याची मोठी गुंतवणूक असते,” असे प्रतिपादन करत विद्यार्थ्यांच्या शिक्षणासाठी केलेली मदत ही भविष्यातील सक्षम समाजनिर्मितीची पायाभरणी असल्याचेही यावेळी अधोरेखित करण्यात आले.
या कार्यक्रमास माजी नगराध्यक्ष तथा ज्येष्ठ नेते मधुकर मामा तावडे, नगराध्यक्ष नेहा राहुल काकडे, बांधकाम सभापती अभिजित काकडे, शिक्षण सभापती प्रवीण माळी, स्वच्छता सभापती अक्षय ढोबळे, नगरसेवक राहुल काकडे, धनंजय पाटील, रोहित दांडनाईक, सुशांत सोनवणे, अक्षय जोगदंड, प्रवीण पाठक, तसेच शिक्षकवृंद, भाजपचे पदाधिकारी, कार्यकर्ते आणि मोठ्या संख्येने विद्यार्थी उपस्थित होते.
विद्यार्थ्यांच्या शैक्षणिक प्रवासाला बळ देणारा हा उपक्रम उपस्थितांच्या कौतुकाचा विषय ठरला. वाढदिवसाचे औचित्य साधून सामाजिक उत्तरदायित्व जपत विद्यार्थ्यांच्या शिक्षणासाठी दिलेले हे योगदान निश्चितच प्रेरणादायी असून, अशा उपक्रमांमुळे समाजात सकारात्मक संदेश पोहोचत असल्याची भावना यावेळी व्यक्त करण्यात आली.
लोकविचार सत्य शोधून लिहिण्याची ताकद संपादक अमजद सय्यद 8390088786
