नगर परिषद शाळा क्र. ८ मध्ये मुख्याधिकारी नीता अंधारे यांच्या हस्ते विद्यार्थ्यांचे स्वागत
धाराशिव लोकविचार
नगर परिषद शाळा क्रमांक ८ येथे शाळा प्रवेश उत्सवानिमित्त नव्याने प्रवेश घेतलेल्या विद्यार्थ्यांचा व त्यांच्या पालकांचा सत्कार करण्यात आला. यावेळी विद्यार्थ्यांना मोफत पाठ्यपुस्तके व गणवेशांचे वितरणही करण्यात आले. धाराशिव नगर परिषदेच्या मुख्याधिकारी नीता अंधारे यांच्या प्रमुख उपस्थितीत हा कार्यक्रम उत्साहपूर्ण वातावरणात पार पडला.
यावेळी मुख्याधिकारी नीता अंधारे यांनी विद्यार्थ्यांना शिक्षणाचे महत्त्व पटवून देत नियमित शाळेत उपस्थित राहण्याचे आवाहन केले. तसेच गुणवत्तापूर्ण शिक्षणासाठी नगर परिषद प्रशासन कटिबद्ध असल्याचे त्यांनी सांगितले. नवीन विद्यार्थ्यांचे स्वागत करून त्यांना उज्ज्वल भविष्यासाठी शुभेच्छा दिल्या.
दरम्यान, ‘एक पेड़ माँ के नाम’ या उपक्रमांतर्गत शाळेच्या इको क्लबच्या वतीने वृक्षारोपण कार्यक्रमही आयोजित करण्यात आला. नवप्रवेशित विद्यार्थी, त्यांच्या पालकांसह प्रमुख पाहुण्यांच्या हस्ते विविध वृक्षांची लागवड करण्यात आली. पर्यावरण संवर्धनाचा संदेश देणाऱ्या या उपक्रमाला उपस्थितांनी उत्स्फूर्त प्रतिसाद दिला.
कार्यक्रमाला प्रशासन अधिकारी तथा मुख्याध्यापक नईम सर, शाळा व्यवस्थापन समितीचे अध्यक्ष काजी नुरोद्दीन, सदस्य शेख इरशाद यांच्यासह शिक्षक, पालक व विद्यार्थी मोठ्या संख्येने उपस्थित होते.
शाळा प्रवेश उत्सवामुळे विद्यार्थ्यांमध्ये शिक्षणाबद्दल उत्साह निर्माण झाला असून, पालकांनीही नगर परिषद शाळांच्या गुणवत्तापूर्ण उपक्रमांचे कौतुक केले. शिक्षणासोबत पर्यावरण संवर्धनाची जोड देत आयोजित करण्यात आलेला हा कार्यक्रम विद्यार्थ्यांसाठी प्रेरणादायी ठरला.
लोकविचार सत्य शोधून लिहिण्याची ताकद संपादक अमजद सय्यद 8390088786
