‘इंधन बचत म्हणजेच इंधन निर्मिती’; एसटीत डिझेल बचतीसाठी राज्यव्यापी मोहीम — परिवहनमंत्री प्रताप सरनाईक
दररोज १००० लिटर डिझेल बचतीचे उद्दिष्ट; उत्कृष्ट चालक व आगारांना विशेष प्रोत्साहन
मुंबई लोकविचार :
महाराष्ट्र राज्य मार्ग परिवहन महामंडळाच्या वाढत्या इंधन खर्चावर नियंत्रण मिळवण्यासाठी “इंधन बचत… म्हणजेच इंधन निर्मिती” ही व्यापक मोहीम राज्यभर राबविण्यात येणार असल्याची घोषणा परिवहनमंत्री तथा एसटी महामंडळाचे अध्यक्ष प्रताप सरनाईक यांनी केली.
या संदर्भात मंत्रालयात महत्त्वपूर्ण बैठक पार पडली असून, राज्यातील सर्व विभाग नियंत्रक व आगार व्यवस्थापकांना तातडीने डिझेल बचतीची उद्दिष्टे निश्चित करण्याचे निर्देश देण्यात आले आहेत.
बैठकीत बोलताना मंत्री सरनाईक म्हणाले की, सध्या एसटी महामंडळाला दररोज सरासरी १०.८७ लाख लिटर डिझेलची आवश्यकता भासत आहे. त्यामुळे इंधन खर्च कमी करणे ही काळाची गरज बनली आहे. एसटीच्या प्रत्येक आगाराने दररोज किमान ५ लिटर डिझेल बचतीचे उद्दिष्ट साध्य केले, तरी संपूर्ण राज्यभरातून दररोज सुमारे १००० लिटर डिझेलची बचत होऊ शकते. सध्याच्या डिझेल दरानुसार ही बचत दररोज जवळपास एक लाख रुपयांपर्यंत जाऊ शकते, असे त्यांनी स्पष्ट केले.
“लहान बचतीतून मोठी आर्थिक शिस्त निर्माण होते. हीच बचत भविष्यात एसटी महामंडळासाठी मोठी ताकद ठरू शकते,” असेही सरनाईक यांनी यावेळी नमूद केले.या मोहिमेअंतर्गत प्रत्येक आगाराने बसगाड्यांच्या इंधन वापराचे नियमित विश्लेषण करून बचतीसाठी आवश्यक उपाययोजना राबविण्याचे आदेश देण्यात आले आहेत.
डिझेल बचतीत उल्लेखनीय कामगिरी करणाऱ्या चालकांचा विशेष सत्कार करण्यात येणार असून, त्यांना प्रोत्साहनपर भत्ताही दिला जाणार आहे. तसेच निश्चित उद्दिष्टांपेक्षा अधिक डिझेल बचत करणाऱ्या आगारांना दरमहा विशेष पुरस्कार आणि आर्थिक प्रोत्साहन देण्यात येणार असल्याचेही सरनाईक यांनी सांगितले.
इंधन बचतीसाठी चालकांना वेग नियंत्रण, योग्य गिअरचा वापर, अनावश्यक इंजिन सुरू ठेवणे टाळणे तसेच ब्रेकिंग पद्धतीत सुधारणा याबाबत विशेष प्रशिक्षण दिले जाणार आहे.
याशिवाय बसेसची दैनंदिन तांत्रिक तपासणी, वेळेवर दुरुस्ती आणि इंजिन कार्यक्षमतेची नियमित पाहणी करण्यावरही भर देण्यात येणार असल्याचे त्यांनी स्पष्ट केले.राज्यभरातील एसटी आगारांमध्ये सकारात्मक स्पर्धा निर्माण करून “इंधन बचत” ही चळवळ अधिक प्रभावी करण्याचा सरकारचा प्रयत्न असल्याचेही परिवहनमंत्री प्रताप सरनाईक यांनी यावेळी सांगितले.
लोकविचार सत्य शोधून लिहिण्याची ताकद संपादक अमजद सय्यद 8390088786
