खोटी ओळख, अत्याचार व ब्लॅकमेल प्रकरण; धाराशिव जिल्ह्यातील वादग्रस्त कला केंद्रे पुन्हा चर्चेत
धाराशिव लोकविचार
एका विवाहित महिलेची फसवणूक करून तिच्यावर अत्याचार, ब्लॅकमेल, जबरदस्तीने विवाह तसेच विविध कला केंद्रांमध्ये काम करण्यास भाग पाडल्याप्रकरणी गंभीर गुन्हा दाखल करण्यात आला आहे. या प्रकरणामुळे धाराशिव, बीड, संभाजीनगर, वाशीम आणि नांदेड जिल्ह्यातील काही कला केंद्रांचा मुद्दा पुन्हा चर्चेत आला आहे.तक्रारदार महिलेच्या माहितीनुसार, कौटुंबिक वादानंतर ती आई-वडील व मुलांसह २०२३ मध्ये पुणे येथे कामासाठी गेली होती. शिक्रापूर येथे एका कंपनीत काम करत असताना मुस्कान नावाच्या महिलेची तिची ओळख झाली. अधिक पैसे मिळतील असे सांगून तिला धाराशिव येथील गौरी कला केंद्रात नेण्यात आले. तेथे अर्चना नावाच्या महिलेच्या पार्टीत तिला नाच करण्यास सांगण्यात आले. याच ठिकाणी इतर काही मुलींनाही आणण्यात आल्याचे तक्रारीत नमूद आहे.कला केंद्रात काम करत असताना एका व्यक्तीने स्वतःचे नाव “राजू” असे सांगून तिच्याशी ओळख वाढवली. पुढे त्याने कळंब येथील प्रेरणा लॉजसह विविध ठिकाणी नेऊन तिच्याशी संबंध ठेवले व फोटो-व्हिडिओ काढून ब्लॅकमेल केल्याचा आरोप आहे. त्यानंतर लग्नासाठी दबाव टाकत धमक्या दिल्याचेही तक्रारीत म्हटले आहे.नंतर संबंधित व्यक्तीचे नाव सर्फराज अलीम मोमीन असल्याचे समोर आले. तो कळंब येथील रहिवासी असल्याचे पोलिसांनी नमूद केले आहे. तक्रारीनुसार, महिलेला वारंवार मारहाण, शिवीगाळ व मानसिक त्रास देण्यात आला. तिच्या हातावर जबरदस्तीने टॅटू काढण्यात आला तसेच तिच्यावर दबाव टाकून राहणीमान बदलण्यास भाग पाडल्याचाही आरोप करण्यात आला आहे.महिलेच्या म्हणण्यानुसार, आरोपीने तिला बीड जिल्ह्यातील मांजरसुंबा येथील जगदंबा कला केंद्र, त्यानंतर महाकाली कला केंद्र तसेच संभाजीनगर येथील थापीदंडा कला केंद्र येथे नेले. त्या ठिकाणी मारहाण करून काम करण्यास भाग पाडण्यात येत असल्याचा आरोप आहे. पळून जाण्याचा प्रयत्न केल्यानंतरही तिला परत आणून मारहाण करण्यात आल्याचे तक्रारीत नमूद आहे.एका घटनेत तलवारीसारख्या शस्त्राने हल्ला करण्याचाही प्रयत्न झाल्याचा आरोप असून त्यात तिच्या मैत्रिणीला दुखापत झाल्याचे म्हटले आहे. पुढे ती लातूर, लोहा आणि पुणे येथे गेल्यानंतरही आरोपीकडून पाठलाग व धमक्या दिल्या गेल्याचा दावा तक्रारीत करण्यात आला आहे.या प्रकरणी भारतीय न्याय संहिता कलम 115(2), 351(2), 352, 64 आणि 64(2)(m) अंतर्गत पुणे शहरातील खडक पोलीस ठाण्यात झिरो नंबरने गुन्हा दाखल करण्यात आला आहे. पुढील तपासासाठी प्रकरण धाराशिव पोलिसांकडे वर्ग करण्यात आले आहे.दरम्यान, धाराशिव जिल्ह्यातील अनेक कला केंद्रे बंद झाली असली तरी तेथील महिलांवरील कथित अत्याचार आणि गैरप्रकारांची प्रकरणे आता समोर येऊ लागल्याने या संपूर्ण प्रकरणाची सखोल चौकशी करण्याची मागणी नागरिकांकडून होत आहे.
लोकविचार सत्य शोधून लिहिण्याची ताकद संपादक अमजद सय्यद 8390088786
