इंधन दरवाढीमुळे एसटीवर १२४ कोटींचा अतिरिक्त भार तरीही तात्काळ भाडेवाढ नाही — परिवहन मंत्री प्रताप सरनाईक
मुंबई लोकविचार
डिझेलच्या सतत वाढणाऱ्या दरांमुळे महाराष्ट्र राज्य मार्ग परिवहन महामंडळावर मोठा आर्थिक ताण निर्माण झाला असला, तरी सर्वसामान्य प्रवाशांचा विचार करून तात्काळ प्रवासी भाडेवाढ करण्यात येणार नसल्याची माहिती परिवहन मंत्री प्रताप सरनाईक यांनी दिली. मात्र, वाढत्या इंधन खर्चाच्या पार्श्वभूमीवर भाडेवाढीचा प्रस्ताव विचाराधीन असून तो राज्य परिवहन प्राधिकरणाकडे मान्यतेसाठी पाठविण्यात येणार असल्याचेही त्यांनी स्पष्ट केले.
डिझेल दरवाढीच्या पार्श्वभूमीवर मंत्रालयातील परिवहन मंत्री यांच्या दालनात वरिष्ठ अधिकाऱ्यांची महत्त्वपूर्ण बैठक आयोजित करण्यात आली होती. या बैठकीस एसटी महामंडळाचे उपाध्यक्ष व व्यवस्थापकीय संचालक डॉ. माधव कुसेकर यांच्यासह अन्य वरिष्ठ अधिकारी उपस्थित होते. बैठकीत महामंडळाच्या आर्थिक स्थितीचा आढावा घेण्यात आला तसेच वाढत्या इंधन खर्चामुळे निर्माण झालेल्या अडचणींवर सविस्तर चर्चा करण्यात आली.
बैठकीत बोलताना मंत्री सरनाईक म्हणाले की, डिझेलच्या दरात झालेल्या वाढीमुळे एसटी महामंडळावर वार्षिक सुमारे १२४ कोटी रुपयांचा अतिरिक्त आर्थिक भार पडणार आहे. एसटी महामंडळाला दररोज सरासरी १०.८७ लाख लिटर डिझेलची आवश्यकता भासते. सध्या इंडियन ऑईल कॉर्पोरेशनमार्फत डिझेलचा पुरवठा केला जात असून, मागील आठवड्यात प्रति लिटर ८८ रुपये २१ पैसे असलेला दर आता वाढून ९१ रुपये ३१ पैशांपर्यंत पोहोचला आहे. त्यामुळे प्रति लिटर तब्बल ३ रुपये १० पैशांची वाढ झाली आहे.या दरवाढीचा थेट परिणाम महामंडळाच्या खर्चावर होत असून, दररोज सुमारे ३३ लाख ७० हजार रुपयांचा अतिरिक्त खर्च एसटीला सहन करावा लागत आहे. मासिक स्तरावर हा आर्थिक भार सुमारे १० कोटी रुपयांपर्यंत पोहोचत असून, वार्षिक पातळीवर तो १२४ कोटी रुपयांपर्यंत जाण्याची शक्यता व्यक्त करण्यात आली आहे.
मंत्री सरनाईक यांनी सांगितले की, एसटी महामंडळ सध्या आर्थिक अडचणींचा सामना करीत आहे. एप्रिल २०२६ या एकाच महिन्यात महामंडळाला सुमारे ७६ कोटी रुपयांचा तोटा सहन करावा लागला आहे. वाढत्या इंधन खर्चामुळे आर्थिक परिस्थिती अधिकच गंभीर बनत चालली असून, त्यावर उपाययोजना करण्यासाठी शासन विविध पर्यायांचा विचार करीत आहे.तथापि, सर्वसामान्य प्रवाशांवर आर्थिक भार पडू नये यासाठी शासनाची भूमिका संवेदनशील असल्याचे स्पष्ट करताना त्यांनी सांगितले की, कोणतीही भाडेवाढ तातडीने लागू करण्यात येणार नाही.
केंद्र व राज्य शासनाच्या मार्गदर्शनाखाली इंधन दरवाढीच्या अनुषंगाने भाडेवाढीचा प्रस्ताव राज्य परिवहन प्राधिकरणाकडे सादर केला जाईल. संबंधित प्राधिकरणाची मान्यता मिळाल्यानंतरच अंतिम निर्णय घेण्यात येणार आहे.दरम्यान, एसटी महामंडळाचा वाढता खर्च कमी करण्यासाठी इंधन बचत, ई-बसचा वाढता वापर, खर्च नियंत्रण, महसूलवाढीच्या उपाययोजना तसेच आधुनिक तंत्रज्ञानाचा वापर यावर विशेष भर देण्यात येत असल्याचेही परिवहन मंत्री प्रताप सरनाईक यांनी सांगितले.
लोकविचार सत्य शोधून लिहिण्याची ताकद संपादक अमजद सय्यद 8390088786
