रमजानच्या पार्श्वभूमीवर प्रभाग १७ मध्ये तात्काळ उपाययोजना सुरू करा नगरसेवक इस्माईल शेख व एजाज काझी यांची नगर परिषद प्रशासनाकडे विनंती
धाराशिव | लोकमदत न्यूज
मुस्लिम समाज बांधवांच नुकत्याच सुरू झालेल्या पवित्र रमजान महिन्याच्या पार्श्वभूमीवर धाराशिव नगर परिषद प्रभाग क्रमांक १७ मध्ये नागरिकांच्या मूलभूत प्रश्नांकडे कर्तव्यदक्ष लोकप्रतिनिधींनी तात्काळ लक्ष दिले आहे. मुस्लिम बहुल असलेल्या या प्रभागात पिण्याच्या पाण्याची टंचाई, बंद असलेल्या स्ट्रीटलाईट्स तसेच तुंबलेल्या नाल्यांमुळे नागरिकांना विशेषतः नमाज पठणासाठी मस्जिदमध्ये ये-जा करताना अडचणींचा सामना करावा लागत होता.
ही बाब लक्षात येताच या प्रभागातील लोकप्रतिनिधी इस्माईल बाबा शेख व एजाज काझी यांनी तात्काळ प्रशासनाशी संपर्क साधत बंद पडलेली स्ट्रीटलाईट व्यवस्था सुरू करून घेतली. तसेच काही भागात मस्जिद परिसरातील बंद लाईट्सही त्वरित सुरू करण्यात येणार असल्याचे त्यांनी स्पष्ट केले. रमजान महिन्यात मुस्लिम बांधव पहाटे सहरी करून नमाज पठण व धार्मिक वाचन करत असतात. मात्र पाण्याचे नियोजन नसल्याने रोजेदारांना त्रास सहन करावा लागत होता.
या पार्श्वभूमीवर दोन्ही लोकप्रतिनिधींनी मुख्याधिकाऱ्यांची भेट घेऊन प्रभाग क्रमांक १७ मध्ये एक महिन्यासाठी पाण्याचे योग्य नियोजन करावे, ठराविक दिवस व वेळ निश्चित करून नियमित पाणीपुरवठा करावा, अशी मागणी करणार असल्याचे सांगितले. रोजेदार नागरिकांची हेळसांड होऊ नये, यासाठी प्रशासनाने संवेदनशीलता दाखवावी, अशी विनंती त्यांनी केली आहे.
याशिवाय प्रभागात अनेक ठिकाणी नाल्या तुंबून सांडपाणी रस्त्यावर येत असल्याने मस्जिदकडे जाणाऱ्या नागरिकांना मोठ्या अडचणींचा सामना करावा लागत आहे. याबाबतही इस्माईल शेख व एजाज काझी यांनी तात्काळ सर्व नाल्यांची स्वच्छता, रस्त्यांची साफसफाई व सांडपाण्याची विल्हेवाट लावण्याबाबत प्रशासनाकडे पाठपुरावा सुरू केला आहे. संबंधित कामे तातडीने मार्गी लावण्यात येणार असल्याचे त्यांनी सांगितले.
प्रभागातील नागरिकांनी आपली समस्या नगरसेवकांच्या निदर्शनास आणून दिल्यानंतर त्यांनी त्वरित दखल घेत कार्यवाही सुरू केल्यामुळे नागरिकांनी इस्माईल शेख व एजाज काझी यांचे आभार मानले. रमजानसारख्या पवित्र महिन्यात मूलभूत सुविधा सुरळीत राहाव्यात, यासाठी लोकप्रतिनिधींची घेतलेली पुढाकार कौतुकास्पद असल्याची भावना नागरिकांतून व्यक्त होत आहे.
दरम्यान, नगर परिषद प्रशासनानेही या मागण्यांकडे सहानुभूतीपूर्वक पाहून सकारात्मक निर्णय घ्यावा, अशी अपेक्षा व्यक्त करण्यात येत आहे.
लोकमदत न्यूज सत्य शोधून लिहिण्याची ताकद संपादक अमजद सय्यद 8390088786
