नळदुर्ग बस स्थानकावर प्रवाशांची गैरसोय पिण्याच्या पाण्याची सोय व २४ तास वाहतूक नियंत्रक नेमण्याची मागणी
नळदुर्ग | लोकमदत न्यूज
ऐतिहासिक पर्यटनस्थळ म्हणून ओळख असलेल्या नळदुर्ग येथील बस स्थानकावर मूलभूत सुविधांचा अभाव असल्याने प्रवाशांना मोठ्या अडचणींचा सामना करावा लागत आहे. पिण्याच्या पाण्याची सुविधा नसणे आणि रात्रीच्या वेळी वाहतूक नियंत्रक उपलब्ध नसल्यामुळे प्रवाशांमध्ये नाराजी व्यक्त होत असून संबंधित प्रशासनाने तात्काळ उपाययोजना कराव्यात, अशी मागणी अझहर शेख यांनी निवेदनाद्वारे केली आहे.
नळदुर्ग हे राष्ट्रीय महामार्गावरील महत्त्वाचे ठिकाण असून ऐतिहासिक किल्ला आणि पर्यटनस्थळामुळे येथे दररोज मोठ्या प्रमाणात प्रवासी ये-जा करत असतात. मात्र बस स्थानकावर पिण्याच्या पाण्याची कोणतीही कायमस्वरूपी व्यवस्था नसल्याने विशेषतः उन्हाळ्याच्या काळात प्रवाशांना मोठा त्रास सहन करावा लागत आहे. अनेकांना तहान भागवण्यासाठी बाहेरून महागडे पाणी विकत घ्यावे लागते, जे सर्वसामान्य प्रवाशांना परवडणारे नसल्याची भावना व्यक्त केली जात आहे.
याशिवाय रात्रीच्या वेळेत नळदुर्ग बस स्थानकावरून दररोज सुमारे १५ ते २० लांब पल्ल्याच्या बसेस ये-जा करतात. मात्र त्या वेळी वाहतूक नियंत्रक (टीसी) उपलब्ध नसल्यामुळे प्रवाशांना बसची अचूक वेळ, प्लॅटफॉर्म किंवा मार्गाबाबत माहिती मिळत नाही. त्यामुळे अनेकदा प्रवाशांची धावपळ होत असून महिला, ज्येष्ठ नागरिक आणि बाहेरगावाहून येणाऱ्या प्रवाशांना अधिक अडचणींचा सामना करावा लागत आहे.
या पार्श्वभूमीवर नळदुर्ग येथील सजग नागरिक अझहर शेख यांनी महाराष्ट्र राज्य मार्ग परिवहन महामंडळाच्या उस्मानाबाद (धाराशिव) विभाग नियंत्रकांना लेखी निवेदन देऊन प्रवाशांच्या अडचणींकडे लक्ष वेधले आहे.
या निवेदनात बस स्थानक परिसरात तात्काळ शुद्ध पिण्याच्या पाण्याची सुविधा उपलब्ध करून द्यावी तसेच प्रवाशांच्या सोयीसाठी २४ तास वाहतूक नियंत्रकाची नियुक्ती करावी, अशी मागणी करण्यात आली आहे.
दरम्यान, प्रशासनाने या तक्रारीची गांभीर्याने दखल घेऊन नळदुर्ग बस स्थानकावरील प्रवाशांच्या अडचणी दूर कराव्यात आणि आवश्यक सुविधा तातडीने उपलब्ध करून द्याव्यात, अशी अपेक्षा नागरिक व प्रवाशांकडून व्यक्त केली जात आहे.
लोकमदत न्यूज सत्य शोधून लिहिण्याची ताकद
संपादक अमजद सय्यद 8390088786
