‘लाडक्या ठेकेदाराच्या’ कामावर नागरिकांचा संताप

“या या खड्ड्यात पडायला या… मला अजून एक बळी पाहिजे!” धाराशिवच्या ‘लाडक्या ठेकेदाराच्या’ कामावर नागरिकांचा संताप; जीवघेण्या खड्ड्यावरच लावले उपरोधिक होर्डिंग

धाराशिव लोकविचार 

धाराशिव शहरातील जुना उपळा रोड परिसरात सर्व्हिस रोड संपताच निर्माण झालेला तब्बल ५ ते ६ फूट खोल जीवघेणा खड्डा नागरिकांच्या जीवाला धोका ठरत आहे. विशेष म्हणजे या खड्ड्यावर अद्याप स्लॅब टाकण्यात आलेला नसून तो उघडाच ठेवण्यात आल्याने मोठी दुर्घटना घडण्याची शक्यता निर्माण झाली आहे. या प्रकारामुळे संतप्त झालेल्या नागरिकांनी थेट खड्ड्यावरच उपरोधिक होर्डिंग लावत संबंधित ठेकेदाराच्या कामकाजाचा निषेध केला आहे.

“या या खड्ड्यात पडायला या… मला अजून एक बळी पाहिजे, त्याशिवाय माझे समाधान होणार नाही… आपलाच धाराशिवचा लाडका ठेकेदार” अशा आशयाचे होर्डिंग नागरिकांनी लावले असून, या फलकाची शहरात चांगलीच चर्चा सुरू झाली आहे.

जुना उपळा रोड परिसरातील हा खड्डा रात्रीच्या वेळी विशेषतः धोकादायक ठरत असून, वाहनचालक तसेच पादचाऱ्यांच्या जीवितास धोका निर्माण झाला आहे. रस्त्याचे काम अपूर्ण ठेवून नागरिकांच्या सुरक्षेकडे दुर्लक्ष केले जात असल्याचा आरोप स्थानिक नागरिकांकडून करण्यात येत आहे.

दरम्यान, दीड वर्षांपूर्वी याच परिसरात पोदार शाळेतील एका विद्यार्थ्याचा अपघाती मृत्यू झाल्यानंतर नागरिकांनी रस्ता रोको आंदोलन केले होते. त्या घटनेनंतरही रस्त्याच्या सुरक्षेचा प्रश्न कायम असल्याने नागरिकांमध्ये तीव्र संताप व्यक्त होत आहे. पुन्हा एखाद्या निष्पाप व्यक्तीचा बळी गेल्यानंतरच प्रशासनाला जाग येणार का? असा सवाल नागरिक उपस्थित करत आहेत.

“ठेकेदार अजून किती अपूर्ण कामे ठेवणार आणि नागरिकांचा जीव धोक्यात घालणार?” असा सवालही स्थानिक नागरिकांकडून केला जात आहे. संबंधित विभागाने तातडीने या खड्ड्यावर सुरक्षित स्लॅब टाकून रस्ता वाहतुकीसाठी सुरक्षित करावा, अशी मागणी करण्यात आली आहे.

दरम्यान, येत्या १५ दिवसांत रस्त्याची दुरुस्ती न झाल्यास नागरिक स्वतः जेसीबीच्या साहाय्याने सर्व्हिस रोड फोडतील, असा इशाराही नागरिकांनी दिला आहे. त्यामुळे प्रशासन आणि संबंधित ठेकेदार या गंभीर प्रश्नाकडे आता तरी गांभीर्याने पाहणार का, याकडे धाराशिवकरांचे लक्ष लागले आहे.

“सजग नागरिक धाराशिव” यांच्या वतीने लावण्यात आलेल्या या उपरोधिक होर्डिंगमुळे अपूर्ण रस्ते कामे आणि नागरिकांच्या सुरक्षेचा प्रश्न पुन्हा एकदा ऐरणीवर आला आहे.

लोकविचार सत्य शोधून लिहिण्याची ताकद संपादक अमजद सय्यद 8390088786