अनेक वर्षांनंतर पालखी स्वागताचा प्रथम मान नगराध्यक्ष सौ. नेहा राहुल काकडे यांना; भाजपा नगरसेवकांकडून गोरोबा काकांच्या पालखीचे भक्तिभावाने स्वागत!
‘संत येती घरा, तोचि दिवाळी-दसरा’; टाळ-मृदंगाच्या गजरात धाराशिव शहर न्हाऊन निघाले भक्तिरंगात!
धाराशिव | लोकविचार
‘संत येती घरा, तोचि दिवाळी-दसरा’ या उक्तीचा प्रत्यय धाराशिव शहरात संतश्रेष्ठ गोरोबा काका कुंभार यांच्या पालखी आगमनाने आला. श्रीक्षेत्र तेर येथून कार्तिकी वारीसाठी पंढरपूरकडे मार्गस्थ झालेल्या संतश्रेष्ठ गोरोबा काका कुंभार यांच्या पायी दिंडीचे धाराशिव शहरात भक्तिमय वातावरणात स्वागत करण्यात आले. यंदाच्या पालखी स्वागत सोहळ्याला विशेष महत्त्व प्राप्त झाले असून, अनेक वर्षांनंतर धाराशिव नगरपरिषदेवर लोकनियुक्त नगराध्यक्ष विराजमान झाल्याने पालखी स्वागताचा प्रथम मान शहराच्या प्रथम नागरिक म्हणून नगराध्यक्ष सौ. नेहा राहुल काकडे यांना मिळाला.
वास्तविक, धाराशिव शहरात येणाऱ्या संतश्रेष्ठ गोरोबा काकांच्या पालखीचे स्वागत करण्याचा आणि पालखीचा प्रथम मान स्वीकारण्याचा पारंपरिक मान नगराध्यक्षांना दिला जातो. धाराशिव नगरीचे प्रथम नागरिक म्हणून नगराध्यक्ष पालखीचे स्वागत करतात, अशी पूर्वापार परंपरा आहे. मात्र, मागील अनेक वर्षांपासून नगरपरिषदेच्या निवडणुका न झाल्याने नगरपरिषदेवर प्रशासकीय राजवट होती. त्यामुळे या कालावधीत पालखी स्वागताचा मान नगराध्यक्षांऐवजी नगरपरिषद प्रशासनाला, म्हणजेच मुख्याधिकाऱ्यांना मिळत होता. मागील वर्षी नगरपरिषदेच्या निवडणुका झाल्यानंतर धाराशिवला लोकनियुक्त नगराध्यक्ष मिळाले. त्यामुळे अनेक वर्षांच्या खंडानंतर यंदा पालखी स्वागताचा पारंपरिक प्रथम मान पुन्हा शहराच्या प्रथम नागरिक असलेल्या नगराध्यक्ष सौ. नेहा राहुल काकडे यांना मिळाला. त्यामुळे यंदाच्या पालखी स्वागत सोहळ्याला विशेष ऐतिहासिक आणि पारंपरिक महत्त्व प्राप्त झाले.
छत्रपती शिवाजी महाराज चौक येथे नगराध्यक्ष नेहा काकडे आणि भाजपा नगरसेवकांच्या वतीने पालखीचे मोठ्या भक्तिभावाने स्वागत करण्यात आले. नगराध्यक्ष नेहा काकडे यांनी पालखीची आरती करून संतश्रेष्ठ गोरोबा काकांच्या चरणी नतमस्तक होत दर्शन घेतले. यावेळी टाळ-मृदंगाचा गजर, विठ्ठलनामाचा जयघोष आणि वारकऱ्यांच्या उपस्थितीने संपूर्ण परिसर भक्तिरंगात रंगून गेला.
यानंतर संतश्रेष्ठ गोरोबा काकांच्या पालखीची जुन्या धाराशिव शहरातून पारंपरिक नगरपरिक्रमा झाली. शहरातील विविध भागांत नागरिकांनी रांगोळ्या काढून, फुलांची उधळण करीत तसेच आरती ओवाळून पालखीचे स्वागत केले. ठिकठिकाणी वारकऱ्यांचे आदरातिथ्य करण्यात आले.
वारकऱ्यांची सेवा हीच विठ्ठलाची सेवा, या भावनेतून धाराशिवकरांनी पालखी सोहळ्यात उत्स्फूर्त सहभाग नोंदविला. संतश्रेष्ठ गोरोबा काकांच्या भक्ती, श्रमप्रतिष्ठा आणि समर्पणाचा संदेश देणारा हा सोहळा शहरवासीयांसाठी श्रद्धा, भक्ती आणि आनंदाची पर्वणी ठरला.
लोकविचार सत्य शोधून लिहिण्याची ताकद संपादक अमजद सय्यद 8390088786











